काठमाडौं । देशका विभिन्न भागमा परिरहेको वर्षासँगै खसेको पहिरोका कारण सिन्धुपाल्चोक र कालिकोट लगायतका जिल्लामा ठुलो जनधनको क्षति भएको छ ।

सिन्धुपाल्चोकको जुगल गाउँपालिका –२ लिदी भन्ने स्थानमा आज बिहान गएको भीषण पहिरोमा परी १३ घर पुरिएको र पन्ध्र जना घाइते भएको जनाइएको प्रहरीले जनाएको छ । बिहान ६ बजे सो घटना भएको गाउँपालिकाका वडा सदस्य विष्णुलाल दोङले जानकारी दिनुभयो ।

उद्धारका लागि काठमाडौंबाट नेपाली सेनाको हेलिकप्टरमा टोली पठाइएको राष्ट्रिय विपद् जोखिम न्यूनीकरण तथा व्यवस्थापन प्राधिकरणका प्रमुख अनिल पोखरेलले जानकारी दिनुभयो ।

कालिकोटमा ध्यराति पहिरोले घर पुर्दा ६ जनाको मृत्यु
यता, कालिकोटमा मध्यराति पहिरोले घर पुर्दा एकै परिवारका ४ जनासहित ६ जनाको मृत्यु भएको छ। कालिकोट जिल्ला प्रहरी कार्यालयका प्रमुख डीएसपी श्यामबाबु ओलियाका अनुसार बिहीबार राति १२ बजेतिर जिल्लाको महाबै गाउँपालिका वडा नम्बर ३ का राजबहादुर विष्टको घर पुर्दा उनको परिवारका ४ सदस्य र दुई छिमेकीसमेतको मृत्यु भएको हो।

पहिरोमा परी विष्टका दुई छोरा १३ वर्षीय पुष्प, ११ वर्षीय प्रवीण तथा दुई छोरी १८ वर्षीया सविना र १५ वर्षीया आशा विष्टको मृत्यु भएको हो । यसैगरी सोही घरमा सुतेका छिमकी दिलबहादुर विष्टका दुई छोरी १९ वर्षीया शान्ति र १० वर्षीया रेखा विष्टको मृत्यु भएको डीएसपी ओलियाले जानकारी दिनुभयो ।

एकै घरमा सुतेका भए पनि घरमूली राजबहादुर विष्टका दम्पती भने बाँच्न सफल भएका छन् ।

टिनको छानो भएको ढलान घरमाथि पहिरो खस्दा भुइँतलाभन्दा माथि सुतेका जति टिनको छानाले च्यापिएर मृत्यु भएको तर विष्ट दम्पती भुइँतलामा सुतेकाले पक्की घर भएकाले बाँच्न सफल भएका प्रहरीले जनाएको छ ।

६ जनाको घटनास्थलमै मृत्यु भएको र उनीहरूको शव निकाािलसकिएको जानकारी पनि डीएसपी ओलियाले जानकारी दिनुभयो ।

पहिरामा बेपत्ता व्यक्तिको शव फेला
यस्तै, त्रिभुवन राजपथअन्तर्गत मकवानपुरको थाहा नगरपालिका–१२ स्थित गैरीगाउँमा पहिरो परी बेपत्ता भएका व्यक्तिको शव भेटिएको छ । पहिरोमा परी बेपत्ता भएका स्थानीय ५४ वर्षीय काले मोक्तानको शव आज बिहान भेटिएको इलाका प्रहरी कायालय पालुङका प्रहरी निरीक्षक विकासराज तामाङले जानकारी दिनुभयो ।

पहिरोमा परेर एउटा स्काभेटर र तीनवटा टिपर पुरिएका छन् । पहिरोले सडक पुरिएपछि त्रिभुवन राजपथ अवरुद्ध छ । पहिरो पन्छाएर सडक खुलाउने प्रयास भइरहेको प्रहरीले बताएको छ ।