काठमाडौं । प्रधानमन्त्री वालेन्द्र शाह संयुक्त राष्ट्रसङ्घको ८१औँ महासभामा सहभागी हुने–नहुने विषयमा राष्ट्रिय स्वतन्त्र पार्टी (रास्वपा)भित्र दुई धार देखिएको छ।
प्रधानमन्त्री शाह महासभामा नजाने पक्षमा देखिए पनि रास्वपा सभापति रवि लामिछाने भने प्रधानमन्त्री स्वयं सहभागी भएर नेपालको पछिल्लो विपत्ति, जलवायु परिवर्तन तथा बाढीपहिरोलगायतका विषय अन्तर्राष्ट्रिय समुदायसमक्ष उठाउनुपर्ने पक्षमा छन्।
लामिछानेले प्रधानमन्त्री शाहलाई भेटेर महासभामा सहभागी हुन आग्रह गर्ने तयारी गरेका छन्। रास्वपा प्रवक्ता जगदीश खरेलले पनि सभापति र प्रधानमन्त्रीबीच छलफल हुन बाँकी रहेको र केही दिनभित्रै यस विषयमा टुङ्गो लाग्ने बताएका छन्।
सरकारभित्र पनि प्रधानमन्त्री महासभामा जानुपर्ने मत बलियो देखिएको छ। परराष्ट्रमन्त्री शिशिर खनालसहित केही मन्त्री तथा सत्तापक्ष र विपक्षी दलका नेताहरूले प्रधानमन्त्री नै महासभामा सहभागी भएर नेपालको विपत्ति र क्षतिपूर्तिको विषय अन्तर्राष्ट्रिय मञ्चमा उठाउनुपर्ने बताएका छन्।
संयुक्त राष्ट्रसङ्घको महासभा सेप्टेम्बर ८ देखि सुरु हुँदैछ भने उच्चस्तरीय बहस सेप्टेम्बर २२ देखि २८ सम्म सञ्चालन हुनेछ। प्रधानमन्त्री जाने वा नजानेबारे भने सरकारले अझै औपचारिक निर्णय गरिसकेको छैन।
