काठमाडौं, साउन २० । भारतीय कम्युनिस्ट पार्टी (माओवादी) का पोलिटब्यूरो सदस्य मिसिर बेसारा झारखण्ड प्रहरीद्वारा पक्राउ परेका छन्। उनलाई जुलाई २८ मा पक्राउ गरिएको भारतीय सञ्चारमाध्यमहरूले जनाएका छन्।
बेसारासँगै पार्टीका अन्तिम शीर्ष नेतासमेत नियन्त्रणमा आएको दाबी गर्दै सरकारी पक्षले यसलाई माओवादी आन्दोलनको अन्त्यतर्फको महत्वपूर्ण उपलब्धिका रूपमा प्रस्तुत गरेको छ।
साहित्य विषयका स्नातक विद्यार्थी रहेका बेसाराले व्यक्तिगत जीवनको सहज मार्ग त्यागेर मजदुर, किसान तथा आदिवासी समुदायको जीवन परिवर्तन गर्ने र जनवादी क्रान्ति सम्पन्न गर्ने उद्देश्यका साथ सशस्त्र आन्दोलनमा सहभागी भएको बताइन्छ। करिब ४० वर्ष सशस्त्र जनवादी आन्दोलनमा सक्रिय रहेका उनी राज्यको सुरक्षा घेराबन्दी, सहकर्मीहरूको हत्या, सयौं छापामारको पलायन तथा आत्मसमर्पणपछि अन्ततः घेराबन्दीमा परेर पक्राउ परेको जनाइएको छ।
भारतीय सञ्चारमाध्यमहरूका अनुसार बेसारामाथि १४१ वटा मुद्दा दर्ता रहेका थिए भने उनको पक्राउका लागि १ करोड भारतीय रुपैयाँ पुरस्कार घोषणा गरिएको थियो।
यसअघि भारतीय गृहमन्त्री अमित शाहले भारतीय संसद्मा सम्बोधन गर्दै २०२६ मार्च ३० मा भारतलाई “नक्सलमुक्त” घोषणा गरेका थिए। उक्त घोषणाको करिब चार महिनापछि बेसारा पक्राउ परेका हुन्।
