काठमाडौं । सुनसरीको कप्तानगञ्जमा दुई समुदायबीच भएको हिंसात्मक झडपमा गम्भीर घाइते भएका रवीन्द्र मेहताको उपचारका क्रममा निधन भएको छ। उनको मंगलबार बिहान काठमाडौंस्थित महाराजगञ्जको शिक्षण अस्पताल (टिचिङ) मा उपचारका क्रममा मृत्यु भएको वीरेन्द्र केएमले जानकारी दिएका छन्।

रवीन्द्र मेहताको निधनसँगै कप्तानगञ्ज घटनामा ज्यान गुमाउनेको संख्या तीन पुगेको छ। यसअघि सोही घटनामा घाइते भएका ओमप्रकाश मेहता र जयप्रकाश मेहताको पनि उपचारका क्रममा मृत्यु भइसकेको थियो।

गत आइतबार राति सुनसरीको कप्तानगञ्ज क्षेत्रमा दुई समुदायबीच भएको विवाद हिंसात्मक झडपमा परिणत भएपछि अवस्था नियन्त्रणमा लिन सशस्त्र प्रहरीले गोली चलाएको थियो।

घटनास्थलमै देवानगञ्ज–४ का २५ वर्षीय ओमप्रकाश मेहताको मृत्यु भएको थियो। त्यसपछि गम्भीर घाइते देवानगञ्ज–३ का २२ वर्षीय जयप्रकाश मेहताको विराटनगरस्थित न्युरो अस्पतालमा उपचारका क्रममा निधन भएको थियो। अहिले रवीन्द्र मेहताको पनि उपचारकै क्रममा मृत्यु भएपछि उक्त घटनामा ज्यान गुमाउनेको संख्या तीन पुगेको हो।

घटनापछि सुरक्षा व्यवस्था कडा पारिएको छ भने घटनाबारे थप अनुसन्धान जारी रहेको प्रहरीले जनाएको छ।