काठमाडौँ, साउन १८ । सुनसरीको धरान क्षेत्रमा भएको साम्प्रदायिक तनावपछि सरकारसँग वार्तामा सहभागी भएका केही हिन्दू अगुवा राष्ट्रिय स्वतन्त्र पार्टी (रासपा)सँग आबद्ध रहेको खुलेको छ।
जानकारीअनुसार वार्तामा सहभागी राजुराज फुयाल रासपाका नेता हुन्। उनी हालै चितवनमा सम्पन्न रासपाको महाधिवेशनमा केन्द्रीय सदस्य पदका उम्मेदवार बनेका थिए। यसअघि उनी रासपाको स्टार्टअप विभागमा सक्रिय थिए।
फुयाल विभाजित विश्व हिन्दू महासंघको सचिवालय सदस्यका रूपमा सरकारसँगको वार्तामा सहभागी भएको बताइएको छ।
स्रोतका अनुसार गृहमन्त्रीसँगको वार्ताअघि फुयालले रासपा सभापति रवि लामिछानेसँग पनि भेटवार्ता गरेका थिए।
यता धनुषामा गृहमन्त्री सुदन गुरुङलाई संयुक्त हिन्दू मोर्चाका तर्फबाट मागपत्र बुझाउने मुख्य व्यक्ति पनि रासपाकै स्थानीय नेता रहेको खुलेको छ।
उनी जनकपुर उपमहानगरपालिका–८ का रासपा वडा सभापति शनि भगत हुन्। मागपत्रमा पहिलो हस्ताक्षर पनि उनकै रहेको देखिन्छ।
मागपत्रमा नेपाललाई पुनः हिन्दू राष्ट्र घोषणा गर्नुपर्ने, प्रधानमन्त्रीका सल्लाहकार असीम शाहलाई पदमुक्त गर्नुपर्ने लगायतका माग समावेश छन्।
सरकारसँग वार्ता गर्ने प्रतिनिधिहरू र रासपाबीचको सम्बन्ध सार्वजनिक भएसँगै वार्ताको निष्पक्षता र प्रतिनिधित्वबारे प्रश्न उठ्न थालेका छन्।
यद्यपि यस विषयमा रासपा, संयुक्त हिन्दू मोर्चा वा सरकारका तर्फबाट औपचारिक प्रतिक्रिया सार्वजनिक भएको छैन।