बुटवल, साउन १७ । राष्ट्रिय जनमोर्चा लुम्बिनी प्रदेश सचिवालय सदस्य गणेश आचार्यले देशमा बढ्दै गएको साम्प्रदायिक तनाव राज्यका गलत नीति र कमजोर भूमिकाको परिणाम भएको बताउनु भएको छ ।
सुनसरीबाट सुरु भएको साम्प्रदायिक द्वन्द्वको सन्दर्भमा सामाजिक सद्भाव कायम गर्ने उद्देश्यले लुम्बिनी प्रदेश सरकारले आयोजना गरेको सर्वदलीय तथा सर्वपक्षीय बैठकमा बोल्दै आचार्यले राज्यको नीतिगत विचलनकै कारण समाजमा विभाजन र साम्प्रदायिक द्वन्द्व बढ्दै गएको धारणा राख्नुभयो ।
मुख्यमन्त्री चेतनारायण आचार्यको अध्यक्षतामा सम्पन्न बैठकमा प्रदेश सरकारका मन्त्री, विभिन्न राजनीतिक दलका प्रतिनिधि, पूर्वमुख्यमन्त्री, धार्मिक समुदायका अगुवा तथा सञ्चारकर्मीहरूको सहभागिता रहेको थियो ।
बैठकमा आचार्यले २०६३ सालको अन्तरिम संविधान संशोधनपछि क्षेत्रीय, जातीय तथा साम्प्रदायिक राजनीतिलाई संस्थागत रूपमा प्रश्रय दिइएको दाबी गर्दै त्यसकै परिणामस्वरूप मुलुकमा सामाजिक सद्भाव कमजोर बन्दै गएको बताउनुभयो ।
उहाँले भन्नुभयो, “देशलाई वर्गीय, जातीय, क्षेत्रीय र धार्मिक आधारमा विभाजन गर्ने राजनीतिक अभ्यासले राष्ट्रिय एकतालाई कमजोर बनाएको छ । राज्यले समयमै गम्भीरता नदेखाउँदा आज साम्प्रदायिक तनाव बढ्ने अवस्था सिर्जना भएको हो।”
आचार्यले नेपालमा रोहिङ्ग्या शरणार्थी तथा बाह्य मुलुकबाट आउने व्यक्तिहरूको व्यवस्थापनमा राज्यले आवश्यक संवेदनशीलता र जिम्मेवारी नदेखाएको आरोप लगाउँदै त्यसतर्फ तत्काल ध्यान दिन सरकारसँग आग्रह गर्नुभयो ।
उहाँले संघीय शासन व्यवस्थाको स्थापनापछि साम्प्रदायिक राजनीति थप मौलाएको आफ्नो धारणा राख्दै राष्ट्रिय एकता, राष्ट्रिय स्वाधीनता र सामाजिक सद्भावको रक्षाका लागि सबै देशभक्त शक्तिहरू एकजुट हुनुपर्ने आवश्यकता औँल्याउनुभयो ।
राष्ट्रिय जनमोर्चा समाजमा हुने सबै प्रकारका साम्प्रदायिक द्वन्द्व, धार्मिक द्वेष र सामाजिक विभाजनको विपक्षमा दृढतापूर्वक उभिएको उल्लेख गर्दै उहाँले यस्ता गतिविधिविरुद्ध पार्टी निरन्तर संघर्षरत रहने प्रतिबद्धता व्यक्त गर्नुभयो ।
बैठकमा सहभागी अन्य वक्ताहरूले पनि सामाजिक सद्भाव, धार्मिक सहिष्णुता र शान्ति कायम राख्न राज्यले प्रभावकारी भूमिका निर्वाह गर्नुपर्ने तथा समाजमा विभाजन सिर्जना गर्ने गतिविधिमाथि कडाइ गर्नुपर्नेमा जोड दिएका थिए ।
