काठमाडौं, साउन १५ । प्रधानमन्त्री वालेन्द्र शाह (बालेन) ले आफू हिन्दु राष्ट्र पुनःस्थापनाको पक्षमा नरहेको स्पष्ट गरेका छन् । हिन्दु राष्ट्रको अवधारणासँग राजसंस्था जोडिएर आउने भएकाले अहिले त्यसलाई अघि बढाउनु उपयुक्त नहुने उनको भनाइ छ।
शुक्रबार मधेसवादी दलका नेताहरूसँग भएको छलफलका क्रममा हिन्दु राष्ट्रबारे उठेको जिज्ञासाको जवाफ दिँदै प्रधानमन्त्री शाहले नेपालमा हिन्दु राष्ट्रको बहसलाई विभिन्न क्षेत्रले फरक–फरक रूपमा बुझ्ने गरेको बताए।
बैठकपछि जानकारी दिँदै जनता समाजवादी पार्टी नेपालका महासचिव रामकुमार शर्माका अनुसार प्रधानमन्त्री शाहले भने, “हिन्दु राष्ट्र बनाउनेतिर छैनौँ । तराई/मधेसमा हिन्दु राष्ट्रका लागि भएको आन्दोलनको अर्को मर्म छ, पहाडतिरको अर्को मर्म छ। हिन्दु राष्ट्र आएपछि राजसंस्था जोडिएर आउँछ । अहिले त्यसो गर्दा ठीक हुँदैन । राजा ल्याउने पक्षमा छैनौँ । त्यसले संघीयतालाई कमजोर गर्छ । संघीयताको कमिटमेन्ट पनि म पूरा गरेर जान्छु ।”
प्रधानमन्त्री शाहले वर्तमान संविधानले व्यवस्था गरेको संघीय लोकतान्त्रिक गणतन्त्रप्रति सरकार प्रतिबद्ध रहेको पनि बैठकमा दोहोर्याएका थिए । उनले संघीय व्यवस्थालाई अझ प्रभावकारी रूपमा कार्यान्वयन गर्ने सरकारको प्रतिबद्धता व्यक्त गर्दै राजसंस्था पुनःस्थापनातर्फ सरकारको कुनै रुचि नरहेको स्पष्ट पारेका छन् ।
मधेसवादी दलका नेताहरूसँगको छलफलमा समसामयिक राजनीतिक विषय, संघीयताको कार्यान्वयन तथा राष्ट्रिय राजनीतिका विभिन्न मुद्दामा पनि विचार–विमर्श भएको बताइएको छ ।
