काठमाडौँ । तीन किसान सङ्गठनले सुनसरी घटनाको सन्दर्भमा साम्प्रदायिक द्वन्द्वबाट देशको सार्वभौमिकतामाथि आँच पुग्ने धारणा व्यक्त गरेका छन् । २०८३ साउन १५ गते संयुक्त प्रेसवक्तव्य जारी गर्दै उनीहरूले सो धारणा व्यक्त गरेका हुन् ।
अखिल नेपाल किसान महासङ्घ (अप्फा) का अध्यक्ष भैरवराज रेग्मी, क्रान्तिकारी किसान महासङ्घका अध्यक्ष सीताराम तामाङ र अखिल नेपाल प्रगतिशील किसान सङ्घका अध्यक्ष रामदुलार महतोको हस्ताक्षर रहेको उक्त वक्तव्यमा साम्प्रदायिक द्वन्द्व, उन्माद र उत्तेजना फैलाउने देशीविदेशी तत्त्वको षड्यन्त्रप्रति गम्भीर हुन अपिल गरिएको छ ।
मृतकलाई यथेष्ठ क्षतिपूर्ति, घाइतेको नि:शुल्क उपचार र दोषीमाथि कारबाहीको माग गरिएको उक्त प्रेसवक्तव्यको पूर्ण पाठ यस्तो छ :
“सुनसरी देवानगञ्ज गाउँपालिकाको कप्तानगञ्जमा मेहता परिवारका दुई जना युवा ओमप्रकाश मेहता र जयप्रकाश मेहता, सिरहाको गोलबजारमा अर्का एक युवा गणेश यादवसमेत तीन जनाको हत्या भएको दुखद खबरले हामी तीन जिम्मेवार किसान सङ्गठनलाई गम्भीर र चिन्तित तुल्याएको छ ।
सरकारले समयमै स्थिति सम्हाल्न र शान्त तुल्याउन नसक्दा स्थितिले विकराल रूप लिएको देखिन्छ । राजधानीमा गरिएको सर्वदलीय बैठकबाट प्रकाशित अमूर्त र अस्पष्ट संयुक्त वक्तव्यले समस्याको मर्मलाई छुन सकेको पनि देखिएन । यसरी जनताको जिउधनको सुरक्षा नहुने र दिनप्रतिदिन स्थिति अराजक बनाउँदै लगेर विदेशी हस्तक्षेप निम्त्याउने खतरा बढ्न थालेको प्रतीत हुँदैछ । धार्मिक तथा साम्प्रदायिक द्वन्द्व, उन्माद र उत्तेजना भड्काएर विभिन्न समुदायका नेपाली जनतालाई परस्पर लडाउने र घृणा फैलाएर एकअर्कामाथि आक्रमण गराउने जुन अवाञ्छित परिस्थिति सिर्जना गरिदैछ, यसले देशको अखण्डता, राष्ट्रिय स्वाधीनता र सार्वभौमितामाथिकै गम्भीर खतरा उत्पन्न गर्न थालेको छ । त्यसैले देश र जनताप्रति जिम्मेवार जनसमुदायका बिच परस्पर शान्ति र सद्भाव चाहने राजनीतिक दल, नागरिक समाज तथा बिद्वत् समुदायलगायत देशका मेरुदण्ड र जीवनदायिनी शक्ति सम्पूर्ण किसानहरू सडकमा उत्रिएर सबै धर्म, संस्कृतिका नेपाली जनतालाई शान्तिसुव्यवस्था कायम गर्न, उत्तेजना र आवेशमा नआउन जोडदार अपिल गर्नु अत्यावश्यक र तत्कालैको ज्वलन्त कदम बन्न गएको हामी औल्याउँछौँ, अन्यथा साम्प्रदायिक महामारीको कुत्सित डढेलो सल्काएर नेपाली समाजमा ताण्डव मच्चाउने र विदेशी हस्तक्षेप बढाउने, देश नै विघटन गराउनेजस्ता आत्मघाती खतरा सङ्घारमै पुगिसकेको गम्भीर स्थिति सिर्जना भएर अवाञ्छित तत्त्वकै स्वार्थसिद्धि हुने कुरा निश्चितप्राय: छ ।
अत: हामी देशका जिम्मेवार किसान सङ्गठनहरू एकै स्वरले यो अवाञ्छित साम्प्रदायिक हत्याहिंसा रोक्न, फैलिन र दोहोरिन नदिन जोडदार आग्रह गर्दै हत्याकाण्डको चपेटामा परेका मृतक परिवारलाई यथेष्ठ क्षतिपूर्ति, भरणपोषण र रोजगारीका व्यवस्था सरकारले तत्कालै गरोस् र गोली लागेका सम्पूर्ण घाइतेको नि:शुल्क र पूर्ण उपचार गरोस् तथा दोषीलाई कडाभन्दा कडा कारबाही गरोस् । यस्ता दुखदायी घटना दोहोरिन र फैलिन नदोओस् तथा नेपालमा बसेर र पसेर यस्ता षड्यन्त्र मच्चाउने तत्त्वमाथि कडा निगरानी राखोस् र अपराधीमाथि अधिकतम कडा कारबाही गरोस् भन्नेसमेत जोडदार माग गर्दछौँ । किसान दाजुभाइका परिवारले अनाकहमा आफ्ना सन्तान गुमाउनुपरेको दुखद घडीमा मृतकप्रति दु:खका साथ हार्दिक श्रद्धाञ्जली ब्यक्त गर्दै शोकसन्तप्त सबै किसान परिवारमा गहिरो समवेदना प्रकट गर्दछौँ ।”
