काठमाडौँ । खाडी देशमा रहेका मिसाइल सकिन थालेपछि अमेरिकाले इरान विरुद्ध गर्ने भनिएको ठुलो सैन्य आक्रमण रोकेको छ ।
मिसाल अभावका बाबजुद आक्रमण गर्दा खाडी देशको सुरक्षा अवस्था खतरामा पर्ने भन्दै राष्ट्रपति डोनाल्ड ट्रम्पले अहिलेसम्मकै ठुलो भनिएको सैन्य कारबाहीलाई हालका लागि रोक्न भनेका हुन् ।
द न्युयोर्क टाइम्स र एक्सियोसको रिपोर्टअनुसार शुक्रबार आफ्ना शीर्ष सल्लाहकार र मन्त्रिपरिषद्का सदस्यसँगको उच्चस्तरीय बैठकपछि ट्रम्पले सेनालाई नयाँ ठुला हमला रोक्न निर्देशन दिए ।
अमेरिकी सैन्य अधिकारीले मध्यपूर्वमा तैनाथ अमेरिकी सेनासँग प्याट्रियट इन्टरसेप्टर मिसाइल र अन्य हवाई रक्षा हतियारको भण्डार गम्भीर रूपमा घट्दै गएको चेतावनी दिएका थिए ।
जोइन्ट चिफ्स अफ स्टाफका अध्यक्ष जनरल ड्यान केनले इरान विरुद्ध ठुलो सैन्य अभियान चलाउँदा मध्यपूर्वमा तैनाथ अमेरिकी सैनिक र उसका सहयोगी राष्ट्रको सुरक्षा खतरामा पर्न सक्ने सल्लाह दिएका थिए । सो रिपोर्टअनुसार अप्रिलको अन्त्यसम्ममा अमेरिकाले एक हजार दुई सयभन्दा बढी प्याट्रियट इन्टरसेप्टर मिसाइल प्रयोग गरिसकेको छ ।
हमला रोक्ने यो निर्णय अस्थायी हो वा दीर्घकालीन भन्नेबारे अझै स्पष्ट भइसकेको छैन, यद्यपि अमेरिकी सेना आवश्यक परेमा ठुलो सैन्य अभियानका लागि तयार रहने जनाइएको छ।
लगातार १३ रातसम्म इरानका सैन्य अखडामा बमबारी गर्दै आएको अमेरिकाले शुक्रबार राति भने कुनै पनि हमला गरेन ।
यता, इरानले भने बहराइनमा रहेको अमेरिकी फिफ्थ फ्लिटको नौसैनिक अखडामा ड्रोन र मिसाइल प्रहार गरेको छ । त्यसले गर्दा त्यहाँ कैयौँ ठुला विष्फोट भएका छन् ।
