दाङ । राप्ती गाउँपालिका–३ अन्तर्गत प्रगति टोलमा दियो युवा क्लबले सरसफाइ सचेतना अभियानअन्तर्गत टोल सरसफाइ कार्यक्रम सम्पन्न गरेको छ।
अभियानका क्रममा टोलभित्र रहेका सडक तथा बस्ती क्षेत्रको सरसफाइ गर्नुका साथै सडकमा छरिएका नगल्ने प्रकृतिका फोहोर संकलन गरी उचित व्यवस्थापन गरिएको क्लबले जनाएको छ। स्थानीय वातावरणलाई स्वच्छ र सफा राख्ने उद्देश्यले सञ्चालन गरिएको कार्यक्रममा क्लबका पदाधिकारी, सदस्य तथा स्थानीयवासीको सक्रिय सहभागिता रहेको थियो।
सरसफाइ कार्यक्रम सम्पन्न भएपछि आयोजित समापन कार्यक्रममा सहभागीहरूले वातावरण संरक्षण, फोहोर व्यवस्थापन तथा नियमित सरसफाइको आवश्यकताबारे आफ्ना धारणा व्यक्त गरेका थिए।
क्लबका सचिव पारस पोख्रेलको सञ्चालनमा सम्पन्न कार्यक्रमको अध्यक्षता क्लबका अध्यक्ष गणेश आचार्यले गरेका थिए। कार्यक्रममा क्लबका संरक्षक गणेश प्रसाद आचार्यको समेत उपस्थिति रहेको थियो।
दियो युवा क्लबले आगामी दिनमा पनि समुदायमा सरसफाइ, वातावरण संरक्षण तथा जनचेतनामूलक कार्यक्रमलाई निरन्तरता दिने जनाएको छ।
