गोविन्दकुमार शर्मा, काठमाडौँ ।
नेपाल कम्युनिस्ट पार्टीका संस्थापक महासचिव पुष्पलालको अड्चालिसौँ स्मृतिदिवसका अवसरमा ‘वर्तमान राजनीतिक परिस्थितिमा वामपन्थी दलको भूमिका’ विषयक विचारगोष्ठी सम्पन्न भएको छ ।
२०८३ साउन ८ गते शुक्रबार पुष्पलाल मित्रता केन्द्रको आयोजनामा नयाँबानेश्वरमा सो कार्यक्रम सम्पन्न भएको हो ।
कार्यक्रममा लिखित मन्तव्य राख्दै नेकपा (मसाल) का महामन्त्री मोहनविक्रम सिंहले वर्तमान सरकारलाई अमेरिकी साम्राज्यवादको ‘कठपुतली’ सरकार भएको संज्ञा दिनुभयो ।
नेपाल शक्तिराष्ट्रको युद्धभूमि बन्ने खतरा रहेको स्पष्ट पार्दै उहाँले एमसिसीमार्फत अमेरिकाले नेपालको भूमि प्रयोग गरी तिब्बतमा हस्तक्षेप गर्ने रणनीति बनाएको आरोप लगाउनुभयो ।
उहाँले भन्नुभयो– ‘यसले नेपालको सार्वभौमसत्तामाथि चुनौती सिर्जना गरेको छ ।’
सिंहले वामपन्थी आन्दोलनभित्र बढ्दो सम्झौतापरस्त प्रवृत्ति र पुराना दलको कुशासनका कारण जनतामा निराशा बढेको तथा त्यसले पश्चगामी शक्तिलाई बल पुगेको विश्लेषण अगाडि सार्नुभयो ।
वर्तमान सङ्कट समाधानका लागि वामपन्थीले माक्र्सवादी सिद्धान्तअनुसार आफूलाई रूपान्तरण गर्दै लोकतान्त्रिक शक्तिसँग कार्यगत एकता गर्नुपर्नेमा उहाँको जोड थियो ।
गणतन्त्र, धर्मनिरपेक्षतालगायतका उपलब्धिको रक्षा अहिलेको मुख्य कार्यभार भएको उल्लेख गर्दै दीर्घकालीन रूपमा नयाँ जनवादी क्रान्तिमार्फत समाजवादतर्फ अघि बढ्नु वाम आन्दोलनको रणनीतिक लक्ष्य हुनुपर्ने उहाँको भनाइ थियो ।
नेपाल कम्युनिस्ट पार्टीका संयोजक पुष्पकमल दाहालले राष्ट्रिय स्वाधीनतामाथि बाह्य दबाब र हस्तक्षेप बढ्दै गएको तथा प्रतिक्रान्ति र प्रतिगमनले टाउको उठाउन थालेको भन्दै गम्भीर चिन्ता व्यक्त गर्नुभयो ।
उहाँले मुलुकमा देखिएको सङ्कटको सामना गर्न सबै वामपन्थी तथा कम्युनिस्ट शक्तिबिच साझा विमर्श र सहकार्य अपरिहार्य रहेको बताउनुभयो ।
दाहालले पछिल्लो समय कम्युनिस्ट आन्दोलन कमजोर हुनुमा आफ्नै पक्षका कमजोरी रहेको स्वीकार गर्दै वैचारिक स्कुलिङलाई बेवास्ता गरिएको, दीर्घकालीन रणनीतिभन्दा सरकार गठन र सत्ता समीकरणमा बढी केन्द्रित भएको तथा रणनीति र कार्यनीतिबिचको भिन्नता बिर्सिएको बताउनुभयो ।
परिवर्तनविरोधी शक्तिले दीर्घकालीन रणनीतिका साथ कम्युनिस्ट आन्दोलनलाई कमजोर बनाउन प्रयास गरिरहेको दाबी गर्दै त्यसप्रति सचेत रहन उहाँले आग्रह गर्नुभयो ।
नेकपाका नेता माधवकुमार नेपालले पुष्पलालको शालिक तोडफोड भएको घटनालाई निन्दनीय र अपराधपूर्ण कार्यको संज्ञा दिँदै दोषीमाथि तत्काल छानबिन गरी कडा कारबाही गर्न सरकारसँग माग गर्नुभयो ।
उहाँले देशको राष्ट्रियता, स्वाभिमान र भौगोलिक अखण्डतामाथि विभिन्न चुनौती देखा परेको उल्लेख गर्दै व्यक्तिगत स्वार्थभन्दा माथि उठेर राष्ट्रहितलाई प्राथमिकता दिनुपर्ने बताउनुभयो ।
पुष्पलालले अघि सारेका राष्ट्रियता, लोकतन्त्र र जनजीविकाका मूल आदर्शलाई केन्द्रमा राखेर वाम आन्दोलनलाई पुनर्गठन गर्नुपर्ने कुरामा जोड दिनुभयो ।
नेकपा (एमाले) का नेता प्रदीप ज्ञवालीले मुलुकले विगत सात दशकमा हासिल गरेका राजनीतिक उपलब्धि सङ्कटमा परेको भन्दै वर्तमान परिस्थितिप्रति चिन्ता व्यक्त गर्नुभयो ।
उहाँले गत वर्ष भदौ २३ र २४ का घटनालाई लोकतान्त्रिक उपलब्धि समाप्त पार्ने योजनाबद्ध पश्चगमनको प्रयासको संज्ञा दिँदै त्यसका विरुद्ध सबै लोकतान्त्रिक शक्तिहरू सचेत हुनुपर्ने बताउनुभयो ।
ज्ञवालीले वर्तमान सरकार र प्रधानमन्त्रीप्रति असन्तुष्टि व्यक्त गर्दै संविधान संशोधनका नाममा जनअधिकार कमजोर बनाउने प्रयास भइरहेको आरोप लगाउनुभयो ।
क्रान्तिकारी कम्युनिस्ट पार्टीका प्रवक्ता हेमन्तप्रकाश ओलीले नेपालको वर्तमान राजनीतिक उपलब्धि अत्यन्त संवेदनशील अवस्थामा पुगेको दाबी गर्दै देश नयाँ उपनिवेशवादी अवस्थातर्फ धकेलिएको बताउनुभयो ।
उहाँले अमेरिकी साम्राज्यवादले नेपाली सेनामाथि प्रभाव विस्तार गरेको तथा विभिन्न राजनीतिक शक्तिलाई प्रयोग गरेर ‘सफ्ट कू’ सञ्चालन गरेको आरोपसमेत लगाउनुभयो ।
जगन्नाथ खतिवडाको सभापतित्व तथा जयन्ती राईको स्वागत मन्तव्यसँगै अघि बढेको सो कार्यक्रममा प्रतिनिधिसभा तथा राष्ट्रियसभाका सदस्य, विभिन्न कम्युनिस्ट पार्टीका केन्द्रीय नेता, प्रतिष्ठानका अध्यक्ष, बुद्धिजीवी तथा कार्यकर्ताको उपस्थिति रहेको थियो ।
सो अवसरमा उपस्थित अतिथि तथा सहभागीले पुष्पलालको तस्बिरमा माल्यार्पण गर्नुभएको थियो भने नेकपाका नेता चिरन पुनले साङ्गीतिक कोसेली प्रस्तुत गर्नुभएको थियो ।
