काठमाडौं, साउन २ । राष्ट्रिय जनमोर्चाका महासचिव मनोज भट्टले संविधान संशोधनको नाममा जनआन्दोलन र जनसंघर्षबाट प्राप्त उपलब्धिलाई कमजोर पार्ने तथा प्रतिगमनतर्फ मुलुकलाई धकेल्ने कुनै पनि प्रयास स्वीकार्य नहुने बताएका छन्।
भट्टले संविधान संशोधन लोकतान्त्रिक गणतन्त्र, धर्मनिरपेक्षता, समावेशिता, संघीयता तथा संविधानका मौलिक विशेषतालाई अझ सुदृढ बनाउने उद्देश्यका साथ हुनुपर्ने धारणा व्यक्त गरे। संविधानको मूल मर्म र जनताको बलिदानीबाट स्थापित राजनीतिक उपलब्धिलाई कमजोर बनाउने गरी गरिने संशोधनको राष्ट्रिय जनमोर्चाले दृढतापूर्वक विरोध गर्ने उनले स्पष्ट पारे।
उनका अनुसार संविधान संशोधनका नाममा राज्यको राजनीतिक तथा संवैधानिक चरित्र परिवर्तन गर्ने, लोकतान्त्रिक गणतन्त्रलाई कमजोर बनाउने वा प्रतिगामी शक्तिलाई अनुकूल हुने कुनै पनि कदम जनताको हितविपरीत हुनेछ।
महासचिव भट्टले सरकारले संविधान संशोधनसम्बन्धी प्रस्ताव अघि बढाउँदा त्यसको आवश्यकता, उद्देश्य र औचित्यबारे जनतालाई स्पष्ट जानकारी गराउनुपर्ने बताए। संविधान संशोधनको प्रक्रिया पारदर्शी, लोकतान्त्रिक, जनसहभागितामूलक र राष्ट्रिय हितअनुकूल हुनुपर्नेमा उनले जोड दिए।
देशको वर्तमान राजनीतिक परिस्थिति संवेदनशील रहेको उल्लेख गर्दै भट्टले संविधानका आधारभूत मान्यता र लोकतान्त्रिक उपलब्धिमाथि आघात पुग्ने कुनै पनि गतिविधिविरुद्ध सबै लोकतान्त्रिक तथा देशभक्त शक्तिहरू एकजुट हुनुपर्ने आवश्यकता औँल्याए।
उनले संविधान संशोधनको बहानामा प्रतिगमनकारी एजेन्डा अघि बढाइए राष्ट्रिय जनमोर्चाले त्यसको सशक्त प्रतिवाद गर्ने चेतावनीसमेत दिए।
