काठमाडौँ, साउन २ गते । राष्ट्रिय जनमोर्चाका केन्द्रीय उपाध्यक्ष तथा प्रवक्ता दुर्गा पौडेलले लोकतान्त्रिक आन्दोलनबाट प्राप्त गणतन्त्र, धर्मनिरपेक्षता, मौलिक अधिकार र नागरिक स्वतन्त्रताको रक्षा गर्न लोकतान्त्रिक, वामपन्थी तथा प्रगतिशील शक्तिहरूबीच व्यापक एकता आवश्यक रहेको बताएका छन्।
ॅनिर्वाचन : एक अनुभूति’ पुस्तकको विमोचन समारोहलाई सम्बोधन गर्दै उनले संविधानले संस्थागत गरेका उपलब्धिमाथि विभिन्न चुनौती देखा परिरहेको उल्लेख गर्दै राष्ट्रियता, लोकतन्त्र र सामाजिक न्यायको संरक्षणका लागि सबै परिवर्तनकारी शक्तिहरू साझा मोर्चामा उभिनुपर्ने धारणा व्यक्त गरे ।
पौडेलले विमोचित पुस्तकले निर्वाचन–२०८२ को परिवेशसँगै सुदूरपश्चिम प्रदेशको सामाजिक, आर्थिक, सांस्कृतिक तथा शैक्षिक अवस्थाको यथार्थ चित्रण गरेको बताए। बेरोजगारी, वैदेशिक रोजगारीको बाध्यता, दुर्गम क्षेत्रको विकास चुनौती तथा त्यसबाट जनजीवनमा परेको प्रभावलाई पुस्तकले वास्तविक घटनाका माध्यमबाट प्रस्तुत गरेको उनको भनाइ थियो।
उनले पुस्तकमा सुदूरपश्चिमका स्थानीय इतिहास, सांस्कृतिक सम्पदा र जडीबुटीसम्बन्धी अनुसन्धानमूलक सामग्री समावेश गरिएकाले यो कृति साहित्यिक मात्र नभई अध्ययन–अनुसन्धानका लागि पनि उपयोगी हुने बताए।
सो अवसरमा पौडेलले लेखकले पञ्चायती व्यवस्थाविरुद्धको आन्दोलनदेखि लोकतान्त्रिक संघर्षसम्मका चार दशकभन्दा लामो राजनीतिक तथा सामाजिक अनुभवलाई पुस्तकमा समेटेको उल्लेख गर्दै यस्ता कृतिले नयाँ पुस्तालाई इतिहास, समाज र लोकतान्त्रिक आन्दोलनबारे जानकारी दिन महत्वपूर्ण योगदान पुर्याउने विश्वास व्यक्त गरे ।
