बुटवल । केन्द्रको निर्णयअनुसार नेपाली कांग्रेस लुम्बिनी प्रदेश सरकारबाट बाहिरिने तयारीमा रहेको छ। कांग्रेसले सरकारलाई दिएको समर्थन फिर्ता लिने तथा सरकारमा सहभागी आफ्ना पाँच मन्त्रीलाई राजीनामा गराउने तयारी गरेको हो।
यसका लागि कांग्रेस संसदीय दलका नेता डिल्लीबहादुर चौधरीले मन्त्रीहरू र संसदीय दलका पदाधिकारीको बैठक दाङमा बोलाएका छन्। बैठकको निर्णयअनुसार थप प्रक्रिया अघि बढाइने जनाइएको छ।
कांग्रेसले समर्थन फिर्ता लिएपछि एमाले नेतृत्वको सरकार अल्पमतमा पर्न सक्ने अवस्था देखिएको छ। नेकपाले नयाँ सरकार गठनमा आफू निर्णायक बन्न सक्ने बताएको छ भने एमालेले नयाँ राजनीतिक समीकरणका आधारमा सरकारलाई निरन्तरता दिने जनाएको छ।
लुम्बिनी प्रदेशसभामा एमालेका २९, कांग्रेसका २७ र नेकपाका १३ सांसद छन्। एमाले र नेकपा मिल्दा बहुमत पुग्ने भएकाले नयाँ सत्ता समीकरणको सम्भावना बढेको छ।
