काठमाडौं, असार ३० । प्रतिनिधिसभाकी सांसद रेणुका काउँचाले गणेश नेपालीको घटनालाई लिएर सरकारप्रति कडा असन्तुष्टि व्यक्त गर्दै मानवीय संवेदनशीलतालाई केन्द्रमा राखेर काम गर्न आग्रह गरेकी छन्।
प्रतिनिधिसभाको बैठकमा बोल्दै सांसद काउँचाले सत्ता परिवर्तन भए पनि सरकारले वर्तमान यथार्थलाई आत्मसात गर्न नसकेको टिप्पणी गरिन्। उनले योगमाया न्यौपाने, प्रेम आचार्य र गणेश नेपालीका घटना फरक–फरक भए पनि ती सबै राज्यप्रतिको असन्तुष्टि र विद्रोहका संकेत भएको उल्लेख गरिन्।
उनले सरकारले गणेश नेपालीको घटनालाई गम्भीर रूपमा लिएर त्यसबाट उठेका प्रश्नहरूको जवाफ दिनुपर्ने बताइन्। साथै, सुकुम्बासी बस्तीका नागरिकको मनोविज्ञान बुझ्न र कुनै पनि परिस्थितिमा मानवीय संवेदनामाथि चोट पुग्ने कार्य नगर्न सरकारलाई आग्रह गरिन्।
सांसद काउँचाले गणेश नेपालीको घटनाको सम्पूर्ण जिम्मेवारी काठमाडौं महानगरपालिकामाथि थोपरेर संघीय सरकारले आफ्नो दायित्वबाट पन्छिन खोजेको आरोप समेत लगाइन्। उनले विगतमा हरेक घटनामा पुराना सरकारलाई दोष दिनेहरू अहिले महानगरमा देखिएको व्यवहारबारे पनि आत्मसमीक्षा गर्नुपर्ने धारणा राखिन्।
उनले सुकुम्बासीको समस्या समाधान नगरी केवल ‘सुन्दर काठमाडौं’ को नारा अघि सार्नु उपयुक्त नहुने उल्लेख गर्दै त्यसअघि राज्यले आफ्ना सोच र कार्यशैली सुधार्न आवश्यक रहेको बताइन्।
सांसद काउँचाले सरकार समयमै सचेत भएर आफ्नो संवैधानिक तथा नैतिक दायित्व पूरा गर्न आग्रह गरिन्। साथै, मिडिया हाउस तथा नेताहरूका घर अगाडि सवारीसाधन तेर्स्याएर नागरिकलाई त्रसित बनाउने कार्यको निष्पक्ष छानबिन गरी दोषीमाथि कानुनी कारबाही गर्न पनि सरकारसँग माग गरिन्।
