काठमाडौं, असार ३० । प्रतिनिधिसभाकी सांसद भिमकुमारी बुढाले गरिब सुकुम्बासीहरूको बस्ने र बाँच्ने अधिकार सुनिश्चित गर्न सरकारसँग माग गरेकी छन्।
प्रतिनिधिसभाको बैठकमा विशेष समय लिएर बोल्दै सांसद बुढाले देशमा गरिब सुकुम्बासीहरूको आधारभूत अधिकारमाथि प्रश्न उठाउँदै सरकारले उनीहरूको समस्या समाधानमा गम्भीरता नदेखाएको आरोप लगाइन्।
उनले होल्डिङ सेन्टरहरू डुबानमा पर्दा त्यहाँ आश्रय लिएका परिवारका कपडा, खानेकुरा तथा दैनिक जीवनयापनका आवश्यक सामग्री बाढीले बगाएको उल्लेख गर्दै प्रभावित नागरिकलाई तत्काल राहत तथा सुरक्षित आवासको व्यवस्था गर्न सरकारसँग आग्रह गरिन्। उनले विश्वनाथ गुरुङजस्ता बालबालिका भोकै र नाङ्गो खुट्टा हिँड्न बाध्य भएको अवस्थाप्रति पनि सरकारको ध्यानाकर्षण गराइन्।
सांसद बुढाले सुकुम्बासी बस्तीमा डोजर चलाउँदा इन्द्रबहादुर राई र रविन तामाङ आत्महत्या गर्न बाध्य भएको उल्लेख गर्दै यस्ता घटनाले राज्यको भूमिहीन र विपन्न समुदायप्रतिको व्यवहारमाथि गम्भीर प्रश्न उठाएको बताइन्। उनका अनुसार सुकुम्बासी बस्तीमा आदिवासी, जनजाति, दलित तथा आर्थिक रूपमा विपन्न समुदायका नागरिकहरूको बाहुल्यता रहेको छ, जसले देश निर्माण र विकासमा महत्वपूर्ण योगदान पुर्याएका छन्।
उनले पीडितहरूको आवाज उठाउने व्यक्तिलाई पक्राउ गर्ने, हतकडी लगाउने तथा अपराधीसरह व्यवहार गर्ने प्रवृत्ति लोकतान्त्रिक मूल्य र मान्यताविपरीत रहेको बताइन्। लोकतन्त्रमा नागरिकको आवाज दबाउने होइन, उनीहरूको पीडा सुन्ने, सत्य स्वीकार गर्ने र राज्यले आफ्नो संवैधानिक तथा मानवीय जिम्मेवारी पूरा गर्नुपर्ने उनको भनाइ थियो।
सांसद बुढाले सरकारले पीडितहरूको आवाज दबाउनेभन्दा उनीहरूको समस्या समाधानमा केन्द्रित भई गरिब, भूमिहीन तथा सुकुम्बासी नागरिकको बसोबास र जीविकोपार्जनको अधिकार सुनिश्चित गर्न तत्काल प्रभावकारी कदम चाल्नुपर्ने माग गरिन्।
