दाङ, असार २९ । क्रान्तिकारी कम्युनिस्ट पार्टी, नेपाल जिल्ला संगठन समिति दाङले सरकारको नीति तथा गतिविधिको आलोचना गर्दै प्रेस वक्तव्य जारी गरेको छ। वक्तव्यमा सरकारले जनताको सुरक्षा, रोजगारी, कृषि तथा दैनिक उपभोग्य वस्तुको व्यवस्थापनमा असफल भएको आरोप लगाइएको छ।

पार्टीले किसानले मल नपाएको, महँगीका कारण जनजीवन कष्टकर बनेको, लघुवित्त तथा बैंकको चर्को ब्याजले सर्वसाधारण मर्कामा परेको र बजारमा पेट्रोलियम पदार्थ तथा ग्यासको कृत्रिम अभाव र मूल्यवृद्धि भएको दाबी गरेको छ। साथै, ग्यास डिलर, सम्बन्धित निकाय र जिल्ला प्रशासनलाई सहज आपूर्ति सुनिश्चित गर्न ध्यानाकर्षण गराएको छ।

पार्टीले जिल्लामा देखिएका विकृति, कृत्रिम अभाव र मूल्यवृद्धिविरुद्ध आवश्यक कदम चाल्न सरकारसँग माग गर्दै जनताको पक्षमा आवाज उठाइरहने प्रतिबद्धता व्यक्त गरेको छ।