काठमाडौं, ३० असार । पूर्वमन्त्री तथा सांसद सुमना श्रेष्ठले सडकमा जथाभावी गाडी तेर्स्याएर सर्वसाधारणलाई सास्ती दिने कार्य राज्यकै संरक्षणमा भएको आरोप लगाएकी छन्।
सोमबार फेसबुकमार्फत् धारणा सार्वजनिक गर्दै उनले फरक मत राख्नेहरूलाई ‘पाठ सिकाउने’ नाममा राज्यको माथिल्लो तहबाट बुलिङ गर्ने प्रवृत्तिले लोकतन्त्र, विधिको शासन तथा राज्यप्रतिको जनविश्वास कमजोर बनाइरहेको बताइन्।
श्रेष्ठले जनताको सबैभन्दा नजिकको राज्य संयन्त्र प्रहरी भएकाले उनीहरूलाई दोष दिनुभन्दा नीतिगत तहमा सुधार आवश्यक रहेको उल्लेख गरिन्। शान्ति–सुरक्षा आर्थिक समृद्धिको आधार भएको भन्दै उनले जनता र सुरक्षाकर्मीबीच अविश्वास बढाउने गतिविधि कसैको हितमा नहुने धारणा राखिन्।
उनले राज्य र जनताबीचको दूरी घटाउन जनप्रतिनिधिहरूले प्रभावकारी भूमिका निर्वाह गर्नुपर्ने आवश्यकता औँल्याउँदै सुरक्षाकर्मीको कार्यपरिस्थिति, मानसिक स्वास्थ्य र आवश्यक स्रोत–साधनबारे पनि संसदमा गम्भीर बहस हुनुपर्ने बताइन्।
