खिमराज चालिसे
करनाल (भारत)
हरियाणा राज्यको करनालमा भएको सडक दुर्घटनामा ज्यान गुमाएका नेपाली नागरिकको पहिचान सामाजिक सञ्जालको सहयोगमा खुलेको छ। दुर्घटनापछि मृतकसँग परिचय खुल्ने कागजात नहुँदा पहिचानमा कठिनाइ भएको थियो। तर, सामाजिक सञ्जालमा तस्बिर र घटनाको विवरण व्यापक रूपमा सार्वजनिक भएपछि परिवारसम्म सूचना पुग्न सफल भएको हो।
प्राप्त जानकारीअनुसार दुर्घटनामा मृत्यु हुने व्यक्ति सुदूरपश्चिम प्रदेश, अछाम जिल्लाको तुर्माखाँद गाउँपालिका–७ निवासी ४५ वर्षीय भवानी प्रसाद देवकोटा रहेका छन्।
गत ११ जुलाई २०२६ मा हिमाचल प्रदेशको गुम्बाबाट नेपालतर्फ आउँदै गरेको HP01S-3007 नम्बरको गाडी हरियाणाको करनाल सडकखण्डमा प्राविधिक समस्या आएपछि सडक किनारमा रोकिएको थियो। सोही क्रममा देवकोटा सडकपारि गएका थिए। केहीबेरपछि पुनः गाडीतर्फ फर्किने क्रममा सडक पार गर्दै गर्दा तीव्र गतिमा आएको पिकअप गाडीले उनलाई ठक्कर दिएको प्रहरीले जनाएको छ।
ठक्करबाट गम्भीर घाइते भएका देवकोटाको घटनास्थलमै मृत्यु भएको बताइएको छ।
दुर्घटनापछि मृतकसँग परिचय खुल्ने कागजात नभएकाले पहिचान गर्न समस्या भएको थियो। त्यसपछि प्रवासी नेपाली समुदाय तथा सामाजिक सञ्जाल प्रयोगकर्ताहरूले मृतकको तस्बिर र घटनासम्बन्धी विवरण फेसबुकलगायत विभिन्न माध्यमबाट व्यापक रूपमा साझा गरेका थिए। त्यसकै आधारमा अछामस्थित परिवारले मृतकको पहिचान पुष्टि गरेको जनाइएको छ।
परिवारका सदस्यका अनुसार मृतकको शवको करनालस्थित कल्पना चावला अस्पतालमा पोस्टमार्टम गरिनेछ। त्यसपछि स्थानीय प्रशासनसँग आवश्यक कानुनी प्रक्रिया पूरा गरी अन्त्येष्टिको व्यवस्था गरिने बताइएको छ।
दुर्घटनापछि मृतकको पहिचान खुलाउन तथा परिवारसम्म सूचना पुर्याउन सहयोग गर्ने प्रवासी नेपाली समुदाय र सामाजिक सञ्जाल प्रयोगकर्ताको सक्रियताप्रति स्थानीय नेपाली समुदायले आभार व्यक्त गरेका छन्।
