काठमाडौँ । राष्ट्रिय जनमोर्चाका अध्यक्ष तथा पूर्व उपप्रधानमन्त्री चित्रबहादुर केसीले वर्तमान सरकारको १०० दिने कार्यकाललाई पूर्णतः असफल भएको दाबी गर्दै सरकारलाई “सुशासनको होइन, कुशासनको संवाहक” को संज्ञा दिनुभएको छ । एक अन्तर्वार्तामा बोल्दै उहाँले सरकारले राष्ट्रियता, लोकतन्त्र र संविधानमाथि गम्भीर आघात पुर्याएको आरोप लगाउनु भयो ।
केसीका अनुसार सरकारले सुशासनको नारा दिए पनि व्यवहारमा भ्रष्टाचार, राजनीतिक हस्तक्षेप र लोकतान्त्रिक संस्थामाथिको नियन्त्रण बढाएको छ । उहाँले सरकारको कार्यसम्पादनलाई सकारात्मक मूल्याङ्कन गर्न नसकिने भन्दै “सरकारलाई नम्बर होइन, उल्टो नम्बर दिनुपर्ने स्थिति आएको छ” भन्ने टिप्पणी गर्नुभयो ।
संविधान र लोकतान्त्रिक संस्थामाथि खतरा
सोही अन्तर्वार्तामा धारणाा राख्दै केसीले सरकारले संविधान २०७२ को मर्मलाई कमजोर बनाउने प्रयास गरिरहेको आरोप लगाउनु भएको छ । उहाँका अनुसार संसद, न्यायपालिका तथा प्रशासनिक संयन्त्रलाई राजनीतिक प्रभावमा पारेर लोकतान्त्रिक मूल्य–मान्यतामाथि प्रहार भइरहेको छ । केसीले यस्ता गतिविधिले मुलुकलाई निरंकुशता र अस्थिरतातर्फ धकेल्ने चेतावनी दिनुभयो ।
वैदेशिक हस्तक्षेपबारे गम्भीर आरोप
अन्तर्वार्ताका क्रममा केसीले वर्तमान सरकार वैदेशिक शक्तिको प्रभावमा सञ्चालन भइरहेको दाबी गरे । उनले विशेषगरी अमेरिकी प्रभाव, सीआईए, एसपीपी तथा दलाई लामासँग सम्बन्धित गतिविधिहरूलाई उल्लेख गर्दै नेपालको भूमि भू–राजनीतिक प्रतिस्पर्धाको माध्यम बन्न सक्ने आशंका व्यक्त गर्नुभयो ।
उहाँका अनुसार केही नयाँ राजनीतिक शक्तिहरू पनि विदेशी एजेन्डाअनुसार अघि बढिरहेका छन् र यसले नेपालको राष्ट्रिय सार्वभौमिकतामाथि चुनौती सिर्जना गरिरहेको छ ।
किसान, गरिब र जनजीविकाप्रति सरकार उदासीन
केसीले सरकारले किसानका आधारभूत समस्या समाधान गर्न नसकेको आरोप लगाउनु भयो । बर्खाको समयमा मल अभाव, कृषि संकट, शिक्षा तथा स्वास्थ्य क्षेत्रमा बढ्दो आर्थिक भार, स्वास्थ्य बीमामा कटौती तथा सुकुम्बासीमाथि डोजर चलाउने कार्यलाई उनले जनविरोधी नीति भएको बताउनु भयो ।
उहाँका अनुसार सरकार मजदुर, किसान र गरिब नागरिकको हितभन्दा दलाल पुँजीवादी वर्गको संरक्षणमा केन्द्रित भएको छ ।
देश ‘भीरको टाकुरा’ तर्फ उन्मुख
देशको वर्तमान राजनीतिक अवस्थालाई चिन्ताजनक चित्रण गर्दै केसीले नेपाल जोखिमपूर्ण मोडमा पुगेको दाबी गरे । उहाँले जनता समयमै सचेत नभए मुलुक अझ गम्भीर राजनीतिक द्वन्द्व र अस्थिरतामा फस्न सक्ने चेतावनी दिनुभयो ।
उहाँले राष्ट्रिय जनमोर्चाले राष्ट्रियता, संविधान र सार्वभौमिकताको पक्षमा निरन्तर आवाज उठाइरहेको दाबी गर्दै नागरिकलाई वैदेशिक प्रभाव र राजनीतिक हस्तक्षेपप्रति सजग रहन आग्रह गर्नुभयो ।
