काठमाडौं । गृहमन्त्री सुधन गुरुङले मुगुका गणेश नेपालीको आत्मदाह घटनालाई लिएर संसदमा उठेका प्रश्नको जवाफ दिँदै स्थानीय सरकारको कमजोरीका कारण घटना भएको दाबी गरेका छन्। प्रतिनिधिसभामा शुक्रबार बोल्दै उनले घटनास्थलमा नगर प्रहरीले ह्वील लक लगाएको, नेपाल प्रहरी वा ट्राफिक प्रहरी संलग्न नरहेको बताए।
विपक्षी दलमाथि आक्रामक रूपमा प्रस्तुत भएका गुरुङले संघीय सरकारले स्थानीय सरकारको गल्तीको समेत दोष बोक्नुपरेको भन्दै असन्तुष्टि जनाए। उनले विपक्षीहरूले नै बनाएको कानुन कार्यान्वयन गरिरहेको जिकिर गर्दै सरकार सञ्चालनबारे आफूले सिकाउन सक्ने टिप्पणी गरे।
गृहमन्त्रीले गणेश नेपालीको उपचारका लागि भारत लैजाने सबै तयारी गरिएको तर चिकित्सकहरूको सल्लाहअनुसार उनको अवस्था स्थिर राख्नुपर्ने भएकाले नलगिएको स्पष्ट पारे।
सम्बोधनका क्रममा उनले आफ्नै पार्टीका सांसदप्रति पनि असन्तुष्टि जनाउँदै सदनभित्र र बाहिर एउटै धारणा राख्न आग्रह गरे।
