श्यामलाल पोखरेल, बुटवल ।
अखिल नेपाल जनजाती सम्मेलनका वरिष्ठ केन्द्रीय उपाध्यक्ष केवि थापाले जनजातीका मुद्दा जातीय नभएर वर्गीय भएकाले वर्गीय आधारमै समाधान गर्नुपर्ने बताउनुभएको छ ।
जनजाती सम्मेलनले सातै प्रदेशमा आदिवासी जनजाती दिवस मनाउन शुरु गरेको सन्दर्भमा शुक्रबार प्रदेश ५ को बुटवलमा आयोजित २६ औं आदिवासी दिवसका अवरमा आयोजित कार्यक्रममा उपाध्यक्ष थापाले जनजातीका मुद्दालाई वर्गीय रुपमा समाधान गर्नुपर्ने बताउनुभएको हो ।
वर्ग संघर्षको माध्यमबाट आदिवासीका समस्या तथा मुद्दा समाधान गर्न सकिने उहाँको तर्क छ । नेपालका केही अमुक दल र एनजीओ, आईएनजीओका कारण नेपालका आदिवासी जनजातीबीच विभाजन ल्याउने काम भएको थापाले बताउनुभयो ।
अखिल नेपाल जनजाती सम्मेलनका केन्द्रीय सदस्य तथा मल्लरानी गाउँपालिका प्यूठानका अध्यक्ष अमरध्वज रानाले कम्युनिष्टहरुले वर्गीय मुद्दा छोडेकाले जातीय मुद्दाहरु हावी हुँदा समस्या आएको बताउनुभयो ।
कार्यक्रममा नरबहादुर जीएम, वामपन्थी नेता दुर्गानाथ खरेल, राष्ट्रिय जनमोर्चाका टानबहादुर केसी, कम्युनिष्ट संग्रालयका अध्यक्ष चेतनाथ आचार्य, समता समाजका सल्लाहाकार राजेश विश्वकर्मा, अखिल छैठौंका पुरन पोखरेल लगायतले बोल्दै जातीय र क्षेत्रीयतावादी सोंचलाई परास्त गर्न वर्गसंघर्षका कार्यक्रमलाई अगाडी बढाउनु पर्नेमा जोड दिनुभएको थियो ।
साउन २५ गते आदिवासी जनजाती दिवस भएपनि जातीय र क्षेत्रीयतामा लागेकाहरुलाई सचेत बनाउने उद्वेश्यले दुई दिन अघिनै दिवस मनाइएको अखिल नेपाल जनजाती सम्मेलनका रुपन्देही अध्यक्ष विमल श्रीषले जानकारी गराउनुभयो ।
उषा पुनको अध्यक्षता र विमल श्रीषको सञ्चालनमा कार्यक्रम भएको थियो ।
