खिमराज चालिसे
भारत । भारतको हरियाणा राज्यस्थित फतेहाबादमा नहरमा डुबेर पाल्पाका मजदुरहरूको मृत्यु भएको छ। छोरालाई बचाउने प्रयासमा नहरमा हाम फालेका बुबाले पनि ज्यान गुमाएका हुन्।
मृत्यु हुनेमा पाल्पाको रैनादेवी छहरा गाउँपालिका–३, सिद्धेश्वरका ३१ वर्षीय बिस्नु कुमाल र रिब्दिकोट गाउँपालिका–२, हार्थोकका १६ वर्षीय शुभाष सुनार रहेका छन्। बिस्नु हरियाणाको बिगडढाणस्थित एक कुखुरा फार्ममा कार्यरत थिए। घटना ४ जुलाईमा भएको हो।
प्राप्त जानकारीअनुसार बिस्नु, शुभाष र अर्का एक साथी बीरु कुमाल दिउँसो नजिकैको नहरमा पौडी खेल्न गएका थिए। करिब १५ फिट गहिरो र २० फिट चौडा नहरमाथिको पुलबाट शुभाषले पानीमा हाम फालेपछि तीव्र बहावका कारण उनी डुब्न थालेका थिए। उनलाई बचाउन बिस्नु पनि नहरमा हाम फालेका थिए। तर, तीव्र बहावका कारण दुवै बेपत्ता भएका थिए।
उनीहरूसँगै रहेका बीरु कुमालले पनि उद्धारको प्रयास गरेका थिए। तर, बहाव अत्यधिक भएकाले दुवैलाई बचाउन नसकी पुलमा बाँधिएको डोरीको सहारामा बाहिर निस्किन सफल भएका थिए।
घटनापछि प्रहरीलाई खबर गरिएको थियो। त्यसलगत्तै प्रहरी, स्थानीय बासिन्दा र गोताखोरको टोलीले तीन दिनसम्म खोजी अभियान सञ्चालन गरेको थियो।
खोजीका क्रममा ६ जुलाईमा दुर्घटनास्थलबाट बिस्नुको शव करिब पाँच किलोमिटर तल र शुभाषको शव करिब ३० किलोमिटर तल फेला परेको प्रहरीले जनाएको छ।
दुवै शवको फतेहाबादस्थित सिभिल अस्पतालमा पोस्टमार्टमपछि अन्त्येष्टि गरिएको छ। मूल प्रवाह एकता समाज फतेहाबाद तथा हिसार नगर समितिका पदाधिकारी, कार्यकर्ता, स्थानीय प्रवासी नेपाली र परिवारजनको उपस्थितिमा अन्तिम संस्कार गरिएको मूल प्रवाहका केन्द्रीय सदस्य तथा सुदूरपश्चिमोत्तर क्षेत्रीय अध्यक्ष तारा सोमरले जानकारी दिए।
रोजगारीका सिलसिलामा भारत पुगेका नेपाली श्रमिकमाथि परेको यो घटनाले हरियाणास्थित नेपाली समुदायलाई शोकाकुल बनाएको छ।
