काठमाडौं, असार २१ । राजधानीको अनामनगरस्थित एक होटल शनिबार केहीबेरका लागि विश्वका क्रान्तिकारी शक्तिहरूको साझा मञ्चमा परिणत भयो। पत्रकारका दर्जनौं क्यामेरा, चम्किरहेका फ्ल्यास र तीखो प्रश्नहरूको घेराबीच विश्वका विभिन्न देशबाट आएका क्रान्तिकारी कम्युनिस्ट नेताहरू एकै स्थानमा उभिए। उनीहरूको सन्देश स्पष्ट थियो—साम्राज्यवाद, युद्ध, शोषण र प्रतिक्रियावादविरुद्ध विश्वभरका क्रान्तिकारी तथा प्रगतिशील शक्तिहरूबीच अझ बलियो अन्तर्राष्ट्रिय एकता र संयुक्त संघर्षको विकल्प छैन।

क्रान्तिकारी पार्टी तथा सङ्गठनहरूको अन्तर्राष्ट्रिय समन्वय समिति (आईकोर) द्वारा आयोजित पत्रकार सम्मेलनमा सहभागी प्रतिनिधिहरूले आफ्नो–आफ्नो देशको समसामयिक राजनीतिक अवस्था, श्रमिक तथा किसान आन्दोलन, जनसंघर्ष र वामपन्थी आन्दोलनका अनुभवहरू प्रस्तुत गर्दै विश्वव्यापी प्रतिरोधलाई थप समन्वित र सशक्त बनाउनुपर्ने आवश्यकता औँल्याए। उनीहरूले लोकतान्त्रिक अधिकारको रक्षा, सामाजिक न्यायको स्थापना तथा शान्तिका लागि अन्तर्राष्ट्रिय सहकार्य अपरिहार्य रहेको धारणा व्यक्त गरे।

कार्यक्रममा नेपाल कम्युनिष्ट पार्टी (मसाल)का महामन्त्री मोहन विक्रम सिंह, आईकोरका एसिया संयोजक तथा भारतको मासलाइनका प्रतिनिधि अतिक चक्रवर्ती, आईकोरका मुख्य संयोजक तथा जर्मनीको मार्क्सवादी–लेनिनवादी पार्टी (एमएलपीडी)की प्रतिनिधि मोनिका गार्टनर–एन्जेल, आईकोरका एसिया सहायक संयोजक फिरोज (बङ्गलादेश) तथा भारतको सोसलिस्ट युनिटी सेन्टर अफ इन्डिया (एसयूसीआई)का नेता अरुण कुमार सिंहले सम्बोधन गर्नुभएको थियो।

वक्ताहरूले विश्वका विभिन्न मुलुकमा क्रान्तिकारी आन्दोलनले सामना गरिरहेका चुनौती, श्रमिक वर्गका अधिकार, सामाजिक न्याय, लोकतान्त्रिक आन्दोलन र बढ्दो साम्राज्यवादी हस्तक्षेपका विषयमा धारणा राख्दै अनुभव आदानप्रदान, पारस्परिक सहयोग र संयुक्त पहललाई अझ सुदृढ बनाउनुपर्नेमा जोड दिनुभयो।

पत्रकार सम्मेलनमा उपस्थित सञ्चारकर्मीहरूले राष्ट्रिय तथा अन्तर्राष्ट्रिय समसामयिक राजनीतिक विषयमा उठाएका विभिन्न जिज्ञासाहरूको प्रतिनिधिहरूले विस्तृत जवाफ दिनुभएको थियो। ती प्रश्न–उत्तरका क्रममा विश्व राजनीतिका बदलिँदा समीकरण, जनआन्दोलनका सम्भावना तथा अन्तर्राष्ट्रिय वाम आन्दोलनको आगामी दिशाबारे पनि विचार विमर्श भएको थियो।