काठमाडौँ, असार २२ । अन्तर्राष्ट्रिय कम्युनिस्ट क्रान्तिकारी संगठन (आईकोर) का एसिया संयोजक तथा भारतको मासलाइनका प्रतिनिधि अतिक चक्रवर्तीले एसियामा युद्धको जोखिम बढ्दै गएको भन्दै सबै विवादको शान्तिपूर्ण समाधान खोज्न सम्बन्धित देशहरूलाई आग्रह गरेका छन् ।
आइतबार आइकोरद्वारा आयोजित पत्रकार सम्मेलनलाई सम्बोधन गर्दै उनले इजरायल, अमेरिका र इरानबीच विकसित सैन्य तनावले मध्यपूर्व मात्र नभई सम्पूर्ण विश्वलाई असर पार्ने अवस्था सिर्जना गरेको बताए । गाजामा भएको नरसंहार (जेनोसाइड) विरुद्ध आईकोरले निरन्तर आवाज उठाउँदै आएको उल्लेख गर्दै उनले गाजातर्फ सहायता पुर्याउने अन्तर्राष्ट्रिय अभियानमा पनि आईकोरका प्रतिनिधिहरू सहभागी भएको जानकारी दिए ।
चक्रवर्तीले एसियाली मुलुकहरूमा पनि साम्राज्यवादी हस्तक्षेप बढ्दै गएको बताए । उनले बंगलादेशमा पछिल्लो राजनीतिक परिवर्तनपछि अमेरिकाले आफ्नो रणनीतिक प्रभाव विस्तार गर्ने प्रयास गरिरहेको दाबी गर्दै त्यसको विरोध गर्नुपर्ने बताए । नेपालमा श्रमिक तथा विद्यार्थीहरूको संगठन निर्माण गर्ने अधिकारमाथि हस्तक्षेप हुन सक्ने संकेतसमेत उनले गरे ।
भारतले दक्षिण एसियाली छिमेकी राष्ट्रहरूसँग व्यवहार गर्दा ॅठूलो दाइ’ को मानसिकता देखाएको आरोप लगाउँदै उनले यस्तो नीतिका कारण नेपाल, बंगलादेश, पाकिस्तान, श्रीलंका लगायत छिमेकी मुलुकसँग भारतको सम्बन्ध क्रमशः बिग्रँदै गएको टिप्पणी गरे । बंगलादेशी नागरिकमाथि भइरहेको व्यवहारप्रति पनि उनले असन्तुष्टि व्यक्त गरे।
आईकोरले यी विषयमा प्रस्ताव पारित गरिसकेको उल्लेख गर्दै चक्रवर्तीले भारत सरकारले छिमेकी मुलुकहरूसँग सम्मानजनक सम्बन्ध कायम गर्नुपर्ने, सीमा तथा अन्य द्विपक्षीय विवादहरू वार्ता र शान्तिपूर्ण माध्यमबाट समाधान गर्नुपर्नेमा जोड दिए । दबाब, सैन्य तनाव वा टकरावको नीति समस्याको समाधान हुन नसक्ने उनको भनाइ थियो।
उनले आईकोरले एसियामा संयुक्त रूपमा शान्ति, लोकतान्त्रिक अधिकार तथा जनआन्दोलनहरूको पक्षमा सहकार्य विस्तार गर्ने तयारी गरिरहेको पनि जानकारी दिए ।
