काठमाडौं। नेपाल कम्युनिस्ट पार्टी (मसाल) का महामन्त्री मोहनविक्रम सिंहले विश्वव्यापी रूपमा बढ्दै गएको युद्धको खतरा, फासीवादी प्रवृत्तिको विस्तार, साम्राज्यवादी हस्तक्षेप तथा जनअधिकारमाथिको दमनका चुनौतीहरूको सामना गर्न शान्ति, लोकतन्त्र र जनअधिकारका पक्षमा अन्तर्राष्ट्रिय एकता र साझा अभियानलाई सुदृढ बनाउनुपर्ने आवश्यकता औंल्याउनुभएको छ।

आइकोर (ICOR) द्वारा आयोजित पत्रकार सम्मेलनलाई सम्बोधन गर्दै उहाँले बदलिँदो विश्व परिस्थितिमा प्रगतिशील तथा क्रान्तिकारी शक्तिहरूबीच सहकार्य, समन्वय र ऐक्यबद्धता अझ मजबुत बनाउनु समयको माग भएको बताउनुभयो।

महामन्त्री सिंहले ICOR ले आफ्ना कार्यक्रमलाई व्यापक र महत्वपूर्ण चरणमा अघि बढाएको उल्लेख गर्दै समय, परिस्थिति तथा राष्ट्रिय सन्दर्भका कारण विचार र दृष्टिकोणमा केही भिन्नता देखिए पनि संगठनमा आबद्ध शक्तिहरूको आधारभूत उद्देश्य समान रहेको बताउनुभयो।

उहाँले नेपालको वर्तमान राजनीतिक अवस्थालाई मात्र नभई समग्र एसियाली क्षेत्रको राजनीतिक तथा सामाजिक परिस्थितिलाई अन्तर्राष्ट्रिय परिप्रेक्ष्यमा विश्लेषण गर्दै जनपक्षीय शक्तिहरूले आफ्नो भूमिका थप प्रभावकारी बनाउनुपर्नेमा जोड दिनुभयो।

विश्वका विभिन्न देशका अनुभव, विचार र राजनीतिक दृष्टिकोण फरक–फरक भए पनि शान्ति स्थापना, जनअधिकारको संरक्षण, लोकतान्त्रिक मूल्यको रक्षा तथा सामाजिक रूपान्तरणका साझा लक्ष्यका लागि अन्तर्राष्ट्रिय सहकार्य अपरिहार्य रहेको उहाँको भनाइ थियो।

महामन्त्री सिंहले राजनीति लगायतका विभिन्न क्षेत्रमा महिला सहभागिता विस्तार, अन्तर्राष्ट्रिय ऐक्यबद्धताको सुदृढीकरण तथा विभिन्न देशका जनआन्दोलनबीच अनुभव आदानप्रदानलाई विशेष प्राथमिकता दिनुपर्ने आवश्यकता पनि औंल्याउनुभयो।

उहाँले वर्तमान चुनौतीहरूको प्रभाव नेपालसहित एसियाली मुलुकहरूमा समेत देखिन थालेको उल्लेख गर्दै शान्ति, लोकतन्त्र र जनअधिकारको रक्षा संयुक्त प्रयासबाट मात्रै सम्भव हुने धारणा व्यक्त गर्नुभयो ।