काठमाडौँ असार १७ । राष्ट्रिय सभाको एक्काइसौँ अधिवेशनको २३औँ बैठकमा संकल्प प्रस्तावमाथिको छलफलका क्रममा सांसद तुलप्रसाद विश्वकर्माले प्रविधिको दुरुपयोगमार्फत बढ्दै गएको डिजिटल लैंगिक हिंसाप्रति गम्भीर चिन्ता व्यक्त गर्दै यसको नियन्त्रणका लागि सरकारलाई तत्काल प्रभावकारी कदम चाल्न आग्रह गर्नुभएको छ ।
विश्कर्माले माननीय रेणु चन्दद्वारा प्रस्तुत गरिएको “प्रविधिको प्रयोग गरी हुने लैंगिक हिंसा रोकथाम, नियन्त्रण तथा महिलाको हक, संरक्षण र न्यायमा पहुँच सुनिश्चित गर्न आवश्यक नीतिगत, कानुनी तथा संस्थागत व्यवस्था गर्ने” सम्बन्धी संकल्प प्रस्तावलाई पूर्ण समर्थन जनाउँदै विद्यमान कानुन, नीति तथा राज्य संयन्त्रलाई समयानुकूल परिमार्जन गर्नुपर्ने आवश्यकता औँल्याउनु भयो ।
उहाँका अनुसार डिजिटल माध्यमबाट हुने हिंसा दिनप्रतिदिन बढिरहेको छ, तर राज्यका विद्यमान कानुनी र संस्थागत संरचनाले त्यसलाई प्रभावकारी रूपमा सम्बोधन गर्न सकेका छैनन् । विश्वकर्माले यस्तो हिंसा महिलामाथि बढी केन्द्रित भए पनि पुरुषहरू समेत पीडित भइरहेको उल्लेख गर्दै यसको मूल कारण समाजमा विद्यमान सामन्ती सोच, पितृसत्तात्मक संस्कार तथा विज्ञान–प्रविधिको सही प्रयोगबारे चेतनाको अभाव रहेको बताउनु भयो ।
क्रान्तिकारी दृष्टिकोण प्रस्तुत गर्दै सांसद विश्वकर्माले प्रविधि जनताको मुक्तिको साधन बन्नुपर्नेमा प्रतिक्रियावादी सोच र विकृत संस्कृतिका कारण दमन र हिंसाको माध्यम बनिरहेको टिप्पणी गर्नुभयो । उहाँले समाजलाई वैज्ञानिक, प्रगतिशील र समानतामूलक दिशामा रूपान्तरण नगरी केवल कानुनी व्यवस्थाले मात्र समस्या समाधान नहुने धारणा राख्नुभएको थियो ।
विश्वकर्माले सरकारले तत्काल आवश्यक कानुनी संशोधन, नीतिगत सुधार तथा संस्थागत पुनर्संरचना गरी डिजिटल लैंगिक हिंसाविरुद्ध प्रभावकारी अभियान सञ्चालन गर्नुपर्नेमा जोड दिनुभयो । साथै महिलामाथि बढ्दो डिजिटल हिंसालाई नियन्त्रण गर्न राज्यले विशेष प्राथमिकता दिनुपर्ने उहाँको माग थियो ।
