काठमाडौँ । नेकपा एमालेका अध्यक्ष केपी शर्मा ओली र नेकपाका संयोजक पुष्पकमल दाहाल ‘प्रचण्ड’ ले लोकतन्त्र, संविधान र वामपन्थी आन्दोलनमाथि चुनौती बढिरहेको भन्दै वामपन्थी शक्तिहरूबीच सहकार्य र एकताको आवश्यकता औँल्याएका छन्।
जननेता मदन भण्डारी को ७५औँ जन्मजयन्तीका अवसरमा आयोजित कार्यक्रममा अध्यक्ष ओलीले गत भदौ २३ र २४ गते लोकतन्त्र र वामपन्थी आन्दोलनलाई कमजोर पार्ने प्रतिगामी षडयन्त्र भएको दाबी गर्दै लोकतान्त्रिक र वामपन्थी शक्तिहरू मिलेर त्यसको प्रतिरोध गर्नुपर्ने बताए। उनले एमालेका नीति सही रहेको उल्लेख गर्दै ‘समृद्ध नेपाल, सुखी नेपाली’को लक्ष्य प्राप्तिका लागि पार्टी प्रतिबद्ध रहेको बताए।
त्यसै कार्यक्रममा संयोजक प्रचण्डले संविधानका आधारभूत मान्यता, उत्पीडित समुदायका अधिकार र कम्युनिस्ट आन्दोलनमाथि प्रहार भइरहेको आरोप लगाउँदै कम्युनिस्ट शक्तिहरूबीच कार्यगत सहकार्य र एकतामा ढिलाइ गर्न नहुने बताए। राष्ट्रिय स्वाधीनता, लोकतान्त्रिक उपलब्धिको रक्षा तथा बाह्य हस्तक्षेपविरुद्ध देशभक्त कम्युनिस्ट शक्तिहरू एकजुट हुनुपर्ने उनको भनाइ थियो।
दुवै नेताले वर्तमान राजनीतिक परिस्थितिमा लोकतान्त्रिक तथा वामपन्थी शक्तिहरूबीच सहकार्य अपरिहार्य रहेकोमा जोड दिएका छन्।
