प्यूठान, असार १३। स्वर्गद्वारी नगरपालिकाका उपप्रमुख तथा नेपाल कम्युनिस्ट पार्टी (मसाल) प्यूठान जिल्ला समितिका सचिवालय सदस्य कामरेड मिनराज रानाको शनिबार भएको सवारी दुर्घटनामा निधन भएको छ।
शनिबार दिउँसो स्वर्गद्वारीबाट धनबाङतर्फ जाँदै गरेको सरकारी गाडी भीरबाट खसेर दुर्घटनाग्रस्त हुँदा रानाको घटनास्थलमै निधन भएको हो । उहाँको निधनप्रति नेपाल कम्युनिस्ट पार्टी (मसाल) ले गहिरो दुःख व्यक्त गर्दै शोकसन्तप्त परिवारजन तथा पार्टीका सम्पूर्ण सदस्यहरूप्रति हार्दिक समवेदना र गहिरो सहानुभूति प्रकट गरेको छ।
पार्टीका अनुसार राना एक होनहार, जुझारु, इमानदार, अनुशासित, प्रतिबद्ध तथा कर्तव्यनिष्ठ नेता हुनुहुन्थ्यो। उहाँले विभिन्न जनवर्गीय संगठनहरूमा रहेर महत्त्वपूर्ण जिम्मेवारी निर्वाह गर्नुभएको थियो। पछिल्लो स्थानीय तह निर्वाचनमा राष्ट्रिय जनमोर्चाका तर्फबाट स्वर्गद्वारी नगरपालिकाको उपप्रमुखमा निर्वाचित हुनुभएको थियो।
राना नेपाल कम्युनिस्ट पार्टी (मसाल) प्यूठान जिल्ला समितिको सचिवालय सदस्यका रूपमा सक्रिय रहँदै पार्टी तथा आन्दोलनमा महत्त्वपूर्ण योगदान पुर्याउँदै आउनुभएको थियो । उहाँ स्वर्गद्वारी नगरपालिकाका जनताको प्रिय जनप्रतिनिधिका रूपमा समेत परिचित हुनुहुन्थ्यो ।
पार्टीले उहाँको निधनले प्यूठानको कम्युनिस्ट आन्दोलन तथा पार्टीको समग्र आन्दोलनलाई अपूरणीय क्षति पुगेको जनाएको छ । नेपाल कम्युनिस्ट पार्टी (मसाल) का महामन्त्री मोहनविक्रम सिंहले जारी गर्नुभएको श्रद्धाञ्जली वक्तव्यमा दिवंगत रानाप्रति हार्दिक श्रद्धाञ्जली अर्पण गर्दै शोकाकुल परिवारजनप्रति समवेदना व्यक्त गर्नुभएको छ ।
वक्तव्यमा लेखिएको छः
हार्दिक श्रद्धाञ्जली
“प्यूठान जिल्ला स्वर्गद्वारी नगरपालिका उपप्रमुख कामरेड मिनराज रानाको शनिबार दिउँसो स्वर्गद्वारीबाट धनबाङतर्फ जाँदै गरेको सरकारी गाडी भीरबाट खसेर दुर्घटनाग्रस्त हुँदा उक्त दुर्घटनामा परी मृत्यु भएको छ । हामीले उहाँको मृत्युप्रति गम्भीर दुःख व्यक्त गर्दै सन्तप्त समस्त परिवारजन सहित नेपाल कम्युनिस्ट पार्टी (मसाल) प्यूठान जिल्लाका सम्पूर्ण सदस्यहरूप्रति हार्दिक समवेदना र गहिरो सहानुभूति व्यक्त गर्दछौँ ।
कामरेड मिनराज राना हाम्रो पार्टीको होनाहार, जुझारु, इमान्दार, अनुशासित, प्रतिवद्ध र कर्तव्यनिष्ठ सदस्य हुनुहुन्थ्यो । उहाँले विभिन्न जनवर्गीय संगठनमा रहेर जिम्मेवारी पूरा गर्नु भएको थियो । पछिल्लो समयमा उहाँ राष्ट्रिय जनमोर्चाको तर्फबाट स्वर्गद्वारी नगरपालिकाको उपप्रमुखमा निर्वाचित हुनुभएको थियो । उहाँ नेपाल कम्युनिस्ट पार्टी (मसाल) प्यूठान जिल्ला समितिको सचिवालय सदस्य हुनुहुन्थ्यो । हाम्रो पार्टीको आन्दोलनमा उहाँको धेरै महŒवपूर्ण भूमिका रहेको थियो । उहाँ सामाजिक जीवनमा सहज भिजेको स्वर्गद्वारी नगरपालिकाका जनताको प्रिय जनप्रतिनिधि हुनुहुन्थ्यो । यसरी उहाँको मृत्युले प्यूठानको कम्युनिस्ट आन्दोलनका साथै हाम्रो पार्टीको आन्दोलनमा अपूरणीय क्षति हुन गएको छ ।
अन्तमा हामीले कामरेड मिनराज रानाप्रति हार्दिक श्रद्धाञ्जली अर्पण गर्दछौँ ।”
२०८३ असार १३ गते
