काठमाडौँ । नेत्रविक्रम चन्द ‘विप्लव’ नेतृत्वको नेकपा (माओवादी) त्यागेर ३३ जनाले पार्टी त्यागेका छन् ।
२०८३ असार १३ गते शुक्रबार प्रेसवक्तव्य जारी गर्दै उनीहरूले सो घोषणा गरेका हुनन् ।
कम्युनिस्ट आन्दोलनलाई रूपान्तरण, एकता, पुनर्गठन, ध्रुवीकरण गर्नुपर्ने आवश्यकता भएको अवस्थामा महासचिव विप्लव पछि हटेको आरोप लगाउँदै उनीहरूले केन्द्रीय सदस्य शरद वलीसहित ३३ जनाले आफूहरू नै पार्टीको जिम्मेवारीबाट मुक्त भएको घोषणा गरे ।
वलीका साथै केन्द्रीय सदस्यहरू जया पौडेल, शङ्कर ज्ञवालीसहितका नेताहरूले वक्तव्य जारी गर्दै पार्टी तथा पार्टीको सम्पूर्ण जिम्मेवारीबाट मुक्त भएको जनाए ।
सिङ्गो कम्युनिस्ट आन्दोलन विसर्जनको डिलमा पुग्दा त्यसको कार्यभार पूरा गर्न विप्लवले आवश्यकता नदेखेपछि बाहिरिन बाध्य भएको उनीहरूको दाबी छ ।
पछिल्लो समयमा विप्लव नेतृत्वको माओवादीले अनुशासनको कारबाही गरिरहेका बेला ३३ जना समूहको यो वक्तव्य सार्वजनिक भएको छ ।
