लन्डन, ११ असार । नेपाली कम्युनिष्ट पार्टी (मसाल) का महामन्त्री मोहनविक्रम सिंहले आफ्नो पहिलो बेलायत भ्रमणका क्रममा बेलायती राजनीतिज्ञ तथा पूर्व लेबर पार्टी नेता जेरेमी कोर्बिनसँग भेटवार्ता गर्नुभएको छ ।
मंगलबार बेलायती संसद भवनमा भएको झण्डै एक घण्टाको भेटवार्तामा समाजवादी आन्दोलन, युद्धविरोधी अभियान, नेपाल र बेलायतको समसामयिक राजनीति तथा विश्वव्यापी रूपमा बढ्दै गएको रक्षा बजेटका विषयमा छलफल भएको थियो ।
भेटका क्रममा सांसदसमेत रहेका कोर्बिनले अल्पसंख्यकमाथि बढ्दो दबाब र रक्षा खर्च वृद्धिप्रति चिन्ता व्यक्त गर्दै शान्तिको पक्षमा आफूले सञ्चालन गरिरहेको अभियानबारे जानकारी गराएका थिए । उनले बेलायतमा आप्रवासी समुदायमाथि बढ्दो दक्षिणपन्थी दबाबबारे चर्चा गर्दै नेपालमा समाजवादी शक्तिहरू एकताबद्ध हुन नसकेको विषयमा पनि चासो व्यक्त गरेका थिए ।
सिंहले नेपालमा अमेरिकी र भारतीय प्रभाव बढिरहेको उल्लेख गर्दै संविधान, लोकतन्त्र, गणतन्त्र तथा नागरिक अधिकारको संरक्षणका लागि आफूहरू संघर्षरत रहेको बताउनु भएको थियो । उहाँले वामपन्थी शक्तिहरूबीच एकताको आवश्यकता औँल्याउनु भएको थियो ।
९२ वर्षीय सिंह पहिलोपटक बेलायत भ्रमणमा जानुभएको हो । भ्रमणका क्रममा उहाँले कार्ल मार्क्सको समाधिस्थल, ब्रिटिश पुस्तकालय, नेपाली दूतावास तथा नेपाली समुदायसँग भेटघाट गर्नुभएको छ ।
जर्मनीबाट बेलायत पुगेका सिंह आगामी सोमबार नेपाल फर्कने कार्यक्रम रहेको बताइएको छ ।
