काठमाडौं । नेकपा (एमाले)का अध्यक्ष केपी ओलीले उपाध्यक्ष विष्णु पौडेलको पक्राउलाई राजनीतिक प्रतिशोध र योजनाबद्ध षड्यन्त्रको निरन्तरता भएको बताएका छन्।

सोमबार जारी विज्ञप्तिमा ओलीले विधिको शासन र सामान्य कानुनी प्रक्रियालाई बेवास्ता गर्दै पौडेललाई पक्राउ गरिएको आरोप लगाए। सोधपुछका अन्य विकल्प हुँदाहुँदै राजनीतिक उद्देश्यले गिरफ्तारी गरिएको उनको भनाइ छ।

ओलीले वर्तमान सरकार विपक्षी दलप्रति प्रतिशोधपूर्ण र अलोकतान्त्रिक ढंगले प्रस्तुत भएको आरोप लगाउँदै यस्ता गतिविधि तत्काल बन्द गर्न चेतावनी दिएका छन्। अन्यथा त्यसको परिणाम गम्भीर हुन सक्ने उनको भनाइ छ।

पौडेललाई एमालेको आन्तरिक चुनावी समीक्षा तथा संगठन पुनर्गठन कार्यक्रममा सहभागी भइरहेका बेला सोमबार पक्राउ गरिएको थियो।