भरतपुर, असार ७ । चितवनमा जारी राष्ट्रिय स्वतन्त्र पार्टी (रास्वपा) को प्रथम महाधिवेशनलाई सम्बोधन गर्दै एमाले नेता प्रदीप ज्ञवाली ले रास्वपाले प्राप्त गरेको जनमतको सदुपयोग गर्न आग्रह गरेका छन्।
उनले विश्व राजनीतिमा १९३३ मा एडोल्फ हिट्लर नेतृत्वको दलले पाएको जनादेश र १९९४ मा नेल्सन मण्डेला नेतृत्वको अफ्रिकन नेशनल कांग्रेस ले प्राप्त गरेको जनादेशलाई उदाहरणका रूपमा उल्लेख गर्दै जनमतको प्रयोग वा दुरुपयोगले देशको भविष्य निर्धारण गर्ने बताए।
ज्ञवालीले रास्वपाले प्राप्त जनादेशलाई राष्ट्र निर्माण, लोकतन्त्र सुदृढीकरण र जनताको हितमा प्रयोग गर्ने विश्वास व्यक्त गरे। साथै, जनमतको सही सदुपयोग नभए त्यसले गम्भीर परिणाम निम्त्याउन सक्ने भएकाले जिम्मेवार ढंगले अघि बढ्न आग्रह गरे। उनले सरकारका केही प्रारम्भिक गतिविधिले प्रश्न उठाएको उल्लेख गर्दै ती विषयमा जनतालाई स्पष्ट जवाफ दिनुपर्ने धारणा पनि राखे।
