भिक्टोरिया । साहित्यकार तथा अनेसास केन्द्रीय उपाध्यक्ष गणेश खड्काद्वारा लिखित, साहित्यकार तथा सम्पादक रमेश दाहालद्वारा सम्पादित तथा मिलाप पब्लिकेशन प्रा.लि., काठमाडौंद्वारा प्रकाशित नियात्रा–निबन्धसङ्ग्रह “नक्शामा नभएको देश” को अफ्रिका लोकार्पण पूर्वी अफ्रिकी राष्ट्र सेसेल्स को राजधानी भिक्टोरिया मा सम्पन्न भएको छ।
७ जुन २०२६ मा आयोजित उक्त कार्यक्रमको सभापतित्व एनआरएनए सेसेल्सका उपाध्यक्ष प्रेमबहादुर चन्दले गरेका थिए। कार्यक्रममा एनआरएनए अफ्रिका क्षेत्रीय संयोजक मनोज बि.क. प्रमुख अतिथि तथा एनआरएनए अफ्रिका क्षेत्रीय महिला संयोजक खेसेना लिङ्देन विशेष अतिथिका रूपमा उपस्थित थिए। एनआरएनए सेसेल्सकी महिला उपाध्यक्ष पवित्रा भट्टराईले स्वागत मन्तव्य व्यक्त गर्दै उपस्थित सम्पूर्ण अतिथि तथा सहभागीलाई स्वागत गरेकी थिइन्।
प्रमुख अतिथिका रूपमा मन्तव्य राख्दै मनोज बि.क.ले नेपाली समाजमा अपेक्षाकृत कम परिचित रहेको सेसेल्सबारे लेखकले आफ्नो भ्रमण, अनुभव र अवलोकनलाई कलात्मक ढङ्गले पुस्तकका रूपमा प्रस्तुत गरेको उल्लेख गरे। उनले “नक्शामा नभएको देश” केवल साहित्यिक कृति मात्र नभई एक महत्वपूर्ण ऐतिहासिक दस्तावेजसमेत भएको बताउँदै यसले नेपाली पाठकलाई नयाँ दृष्टिकोण प्रदान गर्ने विश्वास व्यक्त गरे।
कार्यक्रममा बोल्दै कृतिका लेखक गणेश खड्काले पुस्तक तयार पार्ने क्रममा आफूले निकै मेहनत र अनुसन्धान गर्नुपरेको स्मरण गरे। उनले सेसेल्समा रोजगारीका लागि जान लागेको कुरा गर्दा धेरैले पत्याउन नसकेको, कतिपयले “संसारमा सेसेल्स भन्ने देश पनि छ र?” भनेर प्रश्न गरेको, यहाँसम्म कि नक्शामा खोज्दा समेत धेरैले देशको अवस्थिति पहिचान गर्न नसकेको प्रसङ्ग सुनाए। यही जिज्ञासा र खोजको परिणामस्वरूप सेसेल्सको इतिहास, समाज, संस्कृति र नेपाली समुदायबारे अध्ययन गर्दै उक्त पुस्तक लेख्न प्रेरणा मिलेको उनले बताए।
पुस्तकका सम्पादक रमेश दाहाल ले आफ्नो आमुखमार्फत यस कृतिलाई नेपाली पाठकका लागि केवल पढ्ने सामग्री मात्र नभई आत्मनिरीक्षणको एक सशक्त माध्यमका रूपमा व्याख्या गरेका छन्। उनका अनुसार यस कृतिले समाज, सपना र यथार्थलाई पुनर्विचार गर्न प्रेरित गर्दै समकालीन नेपाली नियात्रा–निबन्ध साहित्यमा एक महत्वपूर्ण, गम्भीर र स्मरणीय योगदान पुर्याएको छ।
प्रकाशक मिलाप पब्लिकेशन प्रा.लि.का अध्यक्ष कृष्ण भुसाल ले लेखक नेपाल फर्किएपछि पुस्तकमाथि बृहत् अन्तर्क्रिया कार्यक्रम आयोजना गरिने जानकारी दिएका छन्।
एनआरएनए सेसेल्स र अन्तर्राष्ट्रिय नेपाली साहित्य समाज (अनेसास) अफ्रिका महादेशीय च्याप्टरको संयुक्त आयोजनामा सम्पन्न कार्यक्रममा च्याप्टरका सदस्य तथा कवि महेन्द्र भट्टराईले विमोचित कृति “नक्शामा नभएको देश” माथि समीक्षात्मक परिचर्चा गरेका थिए। कार्यक्रमको सहजीकरण अनेसास अफ्रिका च्याप्टरका महासचिव कवि आर.सी. राई तथा सदस्य कवि गायत्री कुलुङले गरेका थिए।
कार्यक्रममा उपस्थित साहित्यप्रेमी, समाजसेवी तथा नेपाली समुदायका प्रतिनिधिहरूले कृतिको सफल प्रकाशन तथा लोकार्पणप्रति लेखकलाई बधाई ज्ञापन गर्दै पुस्तकले नेपाली साहित्यमा विशिष्ट योगदान पुर्याउने विश्वास व्यक्त गरेका थिए।
