काठमाडौँ, जेठ १८ । राष्ट्रिय सभाका माननीय सदस्य तुलप्रसाद विश्वकर्मा (राजेश) ले प्रधानमन्त्रीको हालैको अभिव्यक्तिप्रति कडा आपत्ति जनाउँदै त्यसलाई राष्ट्रघाती र लज्जास्पद भन्नुभएको छ । राष्ट्रिय सभाको बैठकमा आकस्मिक समयमा बोल्दै उहाँले प्रधानमन्त्रीको अभिव्यक्तिले नेपाली जनताको शिर निहुरिएको दाबी गर्नुभयो ।
सांसद विश्वकर्माले नेपाल र भारतबीच लामो समयदेखि सीमा विवाद रहँदै आएको र सीमाविद् बुद्धिनारायण श्रेष्ठका अनुसार मेचीदेखि महाकालीसम्मका ७२ स्थानमा सीमा समस्या रहेको उल्लेख गर्नुभयो । कालापानी, लिम्पियाधुरा र लिपुलेकका विषयमा बारम्बार प्रश्न उठिरहेको अवस्थामा देशको प्रधानमन्त्री जस्तो जिम्मेवार व्यक्तिले राष्ट्रिय हित र अस्मिता विपरीतको वक्तव्य दिनु अत्यन्त दुःखद भएको उहाँको भनाइ थियो ।
“नेपालले भारतको सिमाना कहाँ–कहाँ मिचेको छ, उहाँ (प्रधानमन्त्री) ले त्यसको सबूत यस सम्मानित सभामा आएर प्रस्तुत गर्नुहोस् भनी म माग गर्दछु,“ सांसद विश्वकर्माले भन्नुभयो ।
उहाँले थप अगाडि भन्नुभयो, “देशको प्रमुख व्यक्तिबाट हुने यस्ता गतिविधि देश र संविधानको हित विपरीत छन् । देशको इतिहास र सीमा विवादको संवेदनशीलता बुझ्नुपर्ने प्रधानमन्त्रीले आफ्ना विज्ञ वा सहयोगीहरूबाट जानकारी लिन सक्नुहुन्थ्यो । तर के उहाँ भारतको अगाडि लम्पसार पर्न चाहनुभएको हो ?”
पहिलेका सरकारहरूलाई विदेशीको चाकडी र दलाली गरेको आरोप लगाउनेहरू नै अहिले सरकारमा आएर यस्तो आपत्तिजनक अभिव्यक्ति दिनु विरोधाभासपूर्ण रहेको उहाँले बताउनुभयो । विगतका सरकारहरूबाट पनि केही कमजोरी भएका हुन सक्ने तर त्यसलाई सुधार्ने नाममा वर्तमान प्रधानमन्त्रीले दिएको अभिव्यक्ति राष्ट्रघाती भएको ठहर गर्दै सांसद विश्वकर्माले आफ्नो भनाइको अन्त्यमा उक्त अभिव्यक्तिप्रति घोर आपत्ति प्रकट गर्नुभयो ।
