काठमाडौं, जेठ १७ । अखिल नेपाल युवक संघले प्रधानमन्त्री बालेन्द्र (बालेन) शाहले संघीय संसदमा दिएको अभिव्यक्तिप्रति गम्भीर आपत्ति जनाउँदै उक्त भनाइ संसदको अभिलेखबाट हटाउन माग गरेको छ।
संघले सोमबार जारी गरेको प्रेस विज्ञप्तिमार्फत प्रधानमन्त्री शाहले संसदको विशेष समयमा नेपालले समेत भारतीय भूभाग मिचेको भन्ने आशयको अभिव्यक्ति दिएको भन्दै त्यसप्रति आफ्नो गम्भीर ध्यानाकर्षण भएको जनाएको हो।
विज्ञप्तिमा नेपाल–भारत सीमा विवाद ऐतिहासिक, राजनीतिक तथा कूटनीतिक विषय भएको उल्लेख गर्दै कालापानी, लिपुलेक र लिम्पियाधुरा क्षेत्र नेपालको अभिन्न भूभाग रहेको तथ्य ऐतिहासिक दस्तावेज, नक्सा, सन्धि तथा विभिन्न प्रमाणहरूले पुष्टि गरेको दाबी गरिएको छ। संघले नेपाली जनताले राष्ट्रिय स्वाधीनता र भौगोलिक अखण्डताको पक्षमा लामो समयदेखि संघर्ष गर्दै आएको स्मरण गराएको छ।
युवक संघले प्रधानमन्त्रीजस्तो जिम्मेवार सार्वजनिक पदमा रहेको व्यक्तिबाट नेपालको राष्ट्रिय अडान कमजोर बनाउने, तथ्यहीन तथा भ्रमपूर्ण अभिव्यक्ति आउनु दुःखद र आपत्तिजनक भएको जनाएको छ। साथै उक्त अभिव्यक्तिले राष्ट्रिय हित र सार्वभौमिकतासँग सम्बन्धित संवेदनशील विषयलाई हल्का रूपमा लिइएको आभास दिएको आरोप पनि लगाएको छ।
विज्ञप्तिमा इतिहासले नेपालले आफ्नो भूभाग गुमाएको पीडा भोगेको देखाए पनि अन्य देशको भूमि अतिक्रमण गरेको तथ्य स्थापित नभएको उल्लेख गरिएको छ। यस्ता अभिव्यक्तिले देशभित्र र बाहिर गलत सन्देश प्रवाह गर्न सक्ने संघको भनाइ छ।
अखिल नेपाल युवक संघले सम्माननीय सभामुखसमक्ष प्रधानमन्त्री शाहको उक्त अभिव्यक्तिलाई संसदको अभिलेखबाट हटाउन आवश्यक प्रक्रिया अगाडि बढाउन अनुरोध गरेको छ। साथै प्रधानमन्त्रीलाई आफ्नो भनाइबारे आत्मसमीक्षा गर्न, उक्त अभिव्यक्ति फिर्ता लिन तथा राष्ट्रियता र राष्ट्रिय स्वाधीनतासम्बन्धी विषयमा जिम्मेवार र परिपक्व अभिव्यक्ति दिन आग्रह गरेको छ।
संघका अध्यक्ष गणेश अधिकारीद्वारा हस्ताक्षरित विज्ञप्तिमा राष्ट्र, राष्ट्रियता, सार्वभौमिकता तथा भौगोलिक अखण्डतासम्बन्धी विषय कुनै व्यक्ति विशेषको लोकप्रियता वा क्षणिक चर्चाको विषय बन्न नसक्ने उल्लेख गरिएको छ।
संघले सम्पूर्ण युवा तथा देशभक्त नेपालीहरूलाई राष्ट्रिय स्वाधीनता, भौगोलिक अखण्डता र राष्ट्रिय हितको पक्षमा एकताबद्ध रहन समेत आह्वान गरेको छ।
