गोविन्दकुमार शर्मा, काठमाडौँ । नेपाल पत्रकार महासङ्घ काठमाडौँको पच्चिसौँ साधारणसभा सम्पन्न भएको छ । २०८३ जेठ ९ गते शनिबार सञ्चारग्राममा सो कार्यक्रम सम्पन्न भएको हो ।
साधारणसभाको उद्घाटन वरिष्ठ पत्रकार किशोर नेपालले ब्यानर पढेर गरेका थिए ।
प्रमुख वक्तासमेत रहेका पत्रकार नेपालले सो अवसरमा मन्तव्य राख्दै पत्रकारिताको अस्तित्व, स्वतन्त्रता र मूलधारे सञ्चारमाध्यमको विश्वसनीयता जोगाउन पत्रकारहरू एकताबद्ध भएर अघि बढ्नुपर्ने बताए ।
सामाजिक सञ्जालको प्रभाव बढे पनि पत्रकारिताको भूमिका अझै महत्त्वपूर्ण रहेको उल्लेख गर्दै उनले पत्रकारले निष्पक्षता, निर्भीकता र आचारसंहितालाई आत्मसात गर्नुपर्ने धारणा राखे ।
उनले सरकारको विज्ञापन नीति र सञ्चारमाध्यमप्रतिको व्यवहार विगतदेखि नै अस्थिर रहँदै आएको उल्लेख गर्दै पत्रकारले निरन्तर सङ्घर्षमार्फत आफ्नो पेसागत मर्यादा जोगाउनुपर्ने बताए ।
पत्रकारिता केवल पेसा नभई लोकतन्त्रको आधार भएकाले यसको संस्थागत अस्तित्व कमजोर हुन नदिन आग्रह गर्दै उनले काठमाडौँ शाखाले देशभरका पत्रकारलाई दिशा दिने क्षमता राख्ने धारणा व्यक्त गरे ।
शाखाको सक्रियता र पत्रकारको स्वतन्त्र भूमिकाले मात्रै महासङ्घलाई बलियो बनाउन सक्ने उनको भनाइ थियो ।
महासङ्घकी अध्यक्ष निर्मला शर्माले राज्यले मिडियामाथि नियन्त्रण र विज्ञापनमा एकाधिकार कायम गर्न खोजेको आरोप लगाउँदै प्रेस स्वतन्त्रतामाथि हस्तक्षेप बढेको बताइन् ।
सञ्चारसम्बन्धी कानुन तथा सरकारी परिपत्रमार्फत मिडियालाई नियन्त्रण गर्ने प्रयास भइरहेको उनको दाबी थियो ।
उनले महासङ्घले प्रेस स्वतन्त्रताको पक्षमा आन्दोलन गरिरहेको र विषयलाई अन्तर्राष्ट्रिय स्तरमा समेत उठाइएको जानकारी दिँदै आन्दोलनलाई रणनीतिक र उपलब्धिमूलक बनाउन आवश्यक रहेको बताइन् ।
अभिव्यक्ति स्वतन्त्रता, प्रेस स्वतन्त्रता र सूचनाको हकलाई थप बलियो बनाउने गरी संविधान संशोधनका लागि महासङ्घले सुझाव दिने जानकारी पनि उनले गराइन् ।
महासङ्घका पूर्व कार्यवाहक अध्यक्ष बाला अधिकारीले विगतमा सामाजिक सञ्जाल बन्द हुँदासमेत महासङ्घले सशक्त आन्दोलन गर्न नसकेको टिप्पणी गरिन् ।
महासङ्घका केन्द्रीय वरिष्ठ उपाध्यक्ष उम्मिदप्रसाद बागचन्दले नेपाली पत्रकारिता मर्यादित बाटोबाट विचलित हुँदै गलत दिशातर्फ गइरहेको भन्दै चिन्ता व्यक्त गरे ।
साधारणसभामा काठमाडौँ शाखाकी अध्यक्ष शोभा अर्यालले आफ्नो कार्यकालमा शाखाले संस्थागत मजबुती, प्रेस स्वतन्त्रता, पत्रकारको क्षमता अभिवृद्धि तथा सञ्चार क्षेत्रका समस्याको समाधानका लागि सक्रिय रूपमा काम गरेको बताइन् ।
उनले “मिडिया बचाउ अभियान”, पत्रकार तालिम, रक्तदान, अन्तरजिल्ला सहकार्यलगायतका कार्यक्रम प्रभावकारी रूपमा सञ्चालन गरिएको उल्लेख गरिन् ।
सीमित स्रोतसाधनका बाबजुद शाखाको गरिमा उँचो बनाउने प्रयास गरिएको बताउँदै आगामी दिनमा पनि पत्रकार हित र संस्थागत विकासका लागि निरन्तर कामगर्ने प्रतिबद्धता व्यक्त गरिन् ।
कार्यक्रममा काठमाडौँ शाखाका निवर्तमान अध्यक्ष सूर्य सुवेदीले नेतृत्व तहमा पारदर्शिता र खुला बहसको आवश्यकतामा जोड दिए ।
कार्यक्रममा महासङ्घका पदाधिकारी, पूर्व अध्यक्ष, पत्रकार तथा विभिन्न सङ्घसंस्थाका प्रतिनिधिको सहभागिता थियो ।
उद्घाटन सत्र काठमाडौँ शाखाकी अध्यक्ष शोभा अर्यालयको अध्यक्षता, काठमाडौँ शाखाकी उपाध्यक्ष कान्ति न्यौपानेले सहभागी अतिथि तथा सदस्यलाई स्वागत गरेकी थिइन् भने कार्यक्रमको सञ्चालन शाखाका सचिव रमेश बोहराले गरेका थिए ।
साधारणसभामा आशिष गुरागाइँ, शन्ताराम बिडारी, दामोदर दवाडी, सूर्य सुवेदी, लक्ष्मणदेव पाण्डे, शिव लम्साल, नहकुल अर्याल, रामकृष्ण अधिकारी, बैरागी जेठा, रोशन दानीलगायत पत्रकारको सहभागिता रहेको थियो ।
बन्दसत्रमा सचिव रमेश कुमार बोहराले वार्षिक सङ्गठनात्मक र कोषाध्यक्ष रामचन्द्र कार्कीले आर्थिक प्रतिवेदन प्रस्तुत गरेका थिए ।
साधारणसभाले संस्थाको वार्षिक सङ्गठनात्मक तथा आर्थिक प्रतिवेदन पारित गर्दै घोषणापत्र समेत जारी गरेको छ । घोषणापत्रमा संस्थागत सुदृढीकरण, प्रेस स्वतन्त्रता र पत्रकारको पेसागत मर्यादा संरक्षणका विषयलाई प्राथमिकतामा राखिएको छ ।
