भद्रपुर । मानव सेवा आश्रमले सडकपेटीमा कसैले पनि कष्टकर जीवनयापन गर्न नपरोस् भनेर ‘मेची–महाकाली राष्ट्रिय उद्धार यात्रा–२०८३’ सुरु गरेको बताएको छ ।
पूर्वीनाका काँकरभिट्टास्थित मेची पुलमा सोमबार साँझ द्वीप प्रज्ज्वलन गरी सुरु भएको उद्धारयात्रा जेठ २२ गतेसम्म देशव्यापी रूपमा सञ्चालन हुनेछ ।
आनी छोइङ डोल्मा फाउन्डेसनकी संस्थापक एवम् गायिका आनी छोइङ डोल्मा, मानव सेवा आश्रमका संस्थापक अध्यक्ष रामजी अधिकारी र मेचीनगर नगरपालिकाकी उपप्रमुख मीना उप्रेतीले शुभारम्भ समारोहलाई सङ्क्षिप्त सम्बोधन गरेका थिए ।
आश्रमले गत १३ वर्षदेखि सहयोगापेक्षी सडकआश्रित मानवको उद्धार र सामाजिक पुनर्मिलनका लागि योगदान पुर्याउँदै आएको आश्रमका संस्थापक अध्यक्ष अधिकारीले बताए ।
फाउन्डेसनकी संस्थापक एवम् गायिका आनी छोइङ डोल्माले मानवताको सेवा नै जीवनको सर्वोत्तम धर्म भएको धारणा राख्दै उद्धार अभियानमा सहयोग पुर्याउन सबै देशवासीलाई आह्वान गरिन् । आश्रम र फाउन्डेसनको सहकार्यमा तेस्रोपटक यो अभियान सञ्चालन गर्न लागिएको उनले जानकारी दिइन् ।
उनकै नेतृत्वमा २६ जना स्वयम्सेवकले मेची–महाकाली यात्रामा सडकमानवको उद्धार गरी जिल्लास्थित आश्रममा राखिनेछ ।
सातै प्रदेशका १९ जिल्लामा मानव सेवा आश्रमको २३ ओटा शाखा सञ्चालनमा छन् । आश्रमले मुलुकको ७७ ओटै जिल्लाबाट आफन्तको साथ गुमाएका सहयोगापेक्षी सडकआश्रित मानवको उद्धार एवम् तिनको मानवोचित व्यवस्थापन गरिरहेको बताएको छ ।
