बुटवल । बुटवलको राजमार्ग चौराहमा भूमिहीन सुकुमवासी तथा अव्यवस्थित बसोवासीले प्रदर्शन गरेका छन् ।
प्रदर्शनकारीले सरकारले वास्तविक भूमिहीनको पहिचान गरी लालपुर्जा दिनुपर्ने र उनीहरूलाई बिना विकल्प बस्ती खाली गर्ने कार्य रोक्न माग गर्दै प्रधानमन्त्री बालेनको राजीनामासमेत माग गरेका छन्।
करिब एक लाख भूमिहीन दलित, सुकुमवासी र अव्यवस्थित बसोवासी रहेका छन् र ८० हजारले आयोगमा निवेदन दिएका छन्।
प्रदर्शनमा सहभागीहरुले प्रधानमन्त्री बालेनको राजीनामा माग्दै चर्को नाराबाजी गरेका छन् ।
उनीहरुले डोजर आतंक बन्द गर, नागरिकलाई विस्तापित होइन स्थापित गर,हाम्रो कर र मत वैध हामी बसेको जमिन कसरी अवैध, नागरिकलाई आत्महत्या गर्न बाध्य पार्ने कार्य बन्द गर, मानव अधिकारको सम्मान गर, ध्वंश हैन बाच्ने अधिकार दे, बस्ती उजाड हैन व्यवस्थापन गर, व्यवस्थापनको नाममा नजरबन्द बन्द गर, विकासको नाममा विनाश स्वीकार्य छैन लगायतका नारा लेखिएका प्लेकार्डसहित प्रदर्शन गरेका छन् ।
जिल्लाभरबाट जम्मा भएका भूमिहीन र अव्यवस्थित बसोवासीको जुलुस अस्पताललाइन हुँदै ट्राफिकचोकमा पुगेर सभामा परिणत हुने संघर्ष समितिले जनाएको छ ।
