काठमाडौँ । राष्ट्रिय जनमोर्चाले रोल्पा दुर्घटनाप्रति आफ्नो पार्टी स्तब्ध भएको जनाउँदै मृतकप्रति श्रद्धाञ्जली तथा शोकसन्तप्त परिवारप्रति समवेदना व्यक्त गरेको छ ।
उपाध्यक्ष तथा प्रवक्ता दुर्गा पौडेलको हस्ताक्षरमा २०८३ वैशाख १७ गते बिहीबार वक्तव्य जारी गर्दै राजमोले सो धारणा व्यक्त गरेको हो ।
देशमा बारम्बार सवारी दुर्घटना हुने गरेकोमा सरकारको गम्भीर ध्यान जानुपर्ने आवश्यकता जोड दिइएको सो वक्तव्यमा दुर्घटना न्युनीकरणका लागि राष्ट्रिय स्तरमा नै छानबिन गर्नुपर्ने आवश्यकतामा जोड दिइएको छ ।
यस्तो छ, प्रेसवक्तव्यको पूर्ण पाठ :
“रोल्पामा पूर्वी रुकुमबाट जलजलाधुरीको मेलामा जान लागेको बलेरो जिप भिरबाट खस्दा २० जनाको घटनास्थलमै मृत्यु भएको दुखद समाचार प्राप्त भएको छ । त्यो समाचारबाट राष्ट्रिय जनमोर्चा स्तब्ध भएको छ । हाम्रो पार्टीले त्यो घटनामा मृत्यु हुने सबै जनाप्रति श्रद्धाञ्जली प्रकट गर्दै उनीहरूका शोकसन्तप्त परिवारप्रति हार्दिक समवेदना प्रकट गर्दछ ।
उक्त दुर्घटना दुर्घटनामा २० जनाको घटनास्थलमा नै मृत्यु भएको समाचार प्राप्त भएको छ तर त्यो घटनामा कति जना घाइते भएका छन् र उनीहरूको अवस्था कस्तो छ ? त्यसबारे कुनै जानकारी प्राप्त हुन सकेको छैन । हामीले मृतक व्यक्तिका सबै परिवारलाई क्षतिपूर्ति दिनका लागि, घाइतेको शीघ्र समुचित प्रकारले उपचारको व्यवस्था गर्न सरकारसित माग गर्दछौँ ।
देशमा बारम्बार सवारी दुर्घटना हुने गरेका छन् । त्यसबारे राष्ट्रिय स्तरमा नै छानबिन गरेर त्यस प्रकारका दुर्घटनालाई कम गर्नका लागि समुचित रूपले व्यवस्था गर्नुपर्ने आवश्यकताप्रति हामीले सरकारको गम्भीर ध्यान आकर्षित गर्न चाहान्छौँ । सडकको व्यवस्था राम्रो नभएकाले, वाहनको व्यवस्था राम्रो नभएकाले, चालकको लापरबाही वा कतिपय कम तालिमप्राप्त व्यक्तिलाई प्नि चालकमा राख्ने गरेकाले पनि त्यस्ता घटना हुने गर्दछन् । कतिपय अवस्थामा चालकले मादक पदार्थ सेवन गर्ने गरेकाले पनि वा वाहनमा बढी सवारी राख्ने गरेकाले पनि त्यस्ता दुर्घटना हुने गरेको पाइन्छ । वाहन सञ्चालनमा पुलिसले आवश्यक चेकजाँच नगर्ने गरेकाले पनि कैयौँ दुर्घटना हुने गर्दछन् । त्यसकारण तिनीहरूबारे विस्तृत रूपले छानबिन गरेर सवारी सञ्चालनमा हुने दुर्घटनालाई कम गर्नका लागि सरकारको विशेष ध्यान जानुपर्ने आवश्यकता छ ।”
