महेन्द्रनगर । कञ्चनपुरको शुक्लाफाँटा नगरपालिका –८ का वडाध्यक्ष बहादुरसिंह महरामाथि कुटपिट गर्नेहरुलाई रिहा गर्न माग गर्दै पूर्व पश्चिम राजमार्ग अवरुद्ध गरिएको छ ।
वडाअध्यक्ष महरामाथि आइतबार कार्यकक्षमै हातपात गर्नेलाई रिहाइको माग गर्दै नेपाली कांग्रेसको भातृ संगठन नेपाल तरुण दलले झलारीस्थित पूर्व–पश्चिम महेन्द्र राजमार्गमा टायर बालेर प्रदर्शन गरेको हो । प्रदर्शनका काराण पूर्व–पश्चिम महेन्द्र राजमार्ग अवरुद्ध बनेको प्रहरीले जनाएको छ ।
आइतबार वडाअध्यक्ष महरामाथि तरुण दलका वडा सभापति नारद ठगुन्नाको नेतृत्वमा गएको समूहले कार्यकक्षमै कुटपिट गरेको थियो । त्यसक्रममा उनीहरुले कार्यालयका सामग्रीसमेत तोडफोड गरेका थिए ।
वडाध्यक्षको किटानी जाहेरी पछि हातपातमा संलग्न शुक्लाफाँटा नगरपालिका–८ का बसन्त ठगुन्ना, कमान सिंह ठगुन्ना, नारद ठगुन्ना, बिनोद ठगुन्ना, नबिन ठगुन्ना, र आनन्द सिंह ठगुन्नालाई प्रहरीले नियन्त्रणमा लिएको हो ।
कुटपिटबाट अध्यक्ष महराको टाउको, घाँटी, पिठ्युँ लगायतका अंगमा चोट लागेको छ। गाउँमा भएको एउटा झगडाको विषयलाई लिएर वडाअध्यक्षमाथि हातपात भएको हो ।
