काठमाडौं । नेपाल कम्युनिष्ट पार्टी (मसाल) ले स्वर्गीय बर्मन बुढाप्रति श्रद्धाञ्जली अर्पण गरेको छ । आइतबार महामन्त्री मोहन विक्रम सिंहले आफ्ना पुराना मित्र स्वर्गीय बुढाप्रति श्रद्धाञ्जली अर्पण गर्दै परिवारजनमा समवेदना प्रकट गर्नुभएको छ ।
बुधबार ललितपुरको पाटन अस्पतालमा उपचारकाक्रमम बुढाको मृत्यु भएको थियो । शोक वक्तव्यमा महामन्त्री सिंहले स्वर्गीय बुढासँगको सहकार्यबारे स्मरण गर्नुभएको छ ।
यस्तो छ, वक्तव्य
‘का. बर्मन बुढाको मृत्युप्रति दुःख प्रकट गर्दै उहाँका परिवारजनप्रति हार्दिक समवेदना प्रकट गर्दछौँ । का. बर्मन बुढा रोल्पा जिल्लाको थवाङका निवासी हुनुहुन्थ्यो । उहाँ नेपाली कम्युनिस्ट आन्दोलनमा सामेल हुँदा रोल्पा जिल्ला प्यूठान जिल्लाअन्तर्गतको भूभाग थियो । २०१२ सालमा गाउँमा मुखियालाई कारवाही गरेवापत उहाँसहितका केही साथीहरूलाई प्यूठान जेलमा ल्याइएको थियो । म त्यसबेला पाल्पा जेलमा रहेको थिएँ । त्यो बेलामा प्यूठान जेलमा हाम्रा ३ जना साथीहरू हुनुहुन्थ्यो । का. बर्मन बुढा र उहाँहरूको बीचमा त्यहीं परिचय भएको थियो ।
उहाँलाई केही समयपछि त्यो जेलबाट मुक्त गरिएको थियो । हामीलाई पाल्पा जेलबाट सल्यान जेलमा सरुवा गरिएको थियो । पछि २०१३ सालमा हामी सल्यान जेलबाट छुटेपछि म सहित खगुलाल गुरुङ, र रुमबहादुर पाण्डे उहाँको घर थवाङमा पुगेका थियौँ । त्यहाँ हामीले उहाँहरूलाई किसान संघमा संगठित गरेका थियौँ । त्यसरी उहाँ नेपाल कम्युनिस्ट पार्टीमा आवद्ध हुनुभएको थियो । २०१५ सालको आम निर्वाचनमा त्यस क्षेत्रमा हाम्रो पार्टीकोतर्फबाट खगुलाल गुरुङ उम्मेदवार बन्नुभएको थियो र थवाङले व्यापक समर्थन गरेर उहाँलाई मतदान गरेको थियो । यसमा का. बर्मन बुढाको धेरै महत्त्वपूर्ण भूमिका रहेको थियो ।
का. बर्मन बुढा कम्युनिस्ट आन्दोलनमा सामेल भएपछि त्यसबाट कहिल्यै पनि विचलित हुनुभएन । उहाँले रोल्पा जिल्लामा पार्टीको संगठनात्मक तथा राजनीतिक कार्यमा महत्त्वपूर्ण भूमिका खेल्नुभएको थियो । पञ्चायत विरोधी संघर्षको क्रममा उहाँ दुईवर्षभन्दा बढी जेल बस्नुभएको थियो । जनमत सङ्ग्रहमा थबाङले एकमतले बहुदलीय व्यवस्थाको पक्षमा मतदान गरेको थियो भने २०३८ सालको पञ्चायती चुनावलाई पूर्ण रूपले बहिष्कार गरेको थियो । हाम्रो पार्टीको राजनीतिक संघर्षको इतिहासमा थबाङमा संघर्षका यी दुई घटना ऐतिहासिक महत्त्वका छन्, जसमा का. बर्मन बुढाले महत्त्वपूर्ण भूमिका खेल्नुभएको थियो ।
२०४२ सालतिर हाम्रो पार्टीमा बिभाजन भएपछि उहाँको संलग्नता का. मोहन वैद्यको पक्षतर्फ रहेको थियो र २०४८ को आम निर्वाचनबाट उहाँ सो पार्टीकोतर्फबाट रोल्पाबाट विजयी भएर प्रतिनिधिसभा सदस्य समेत बन्नुभएको थियो । त्यसरी पार्टी विभाजनका कारणले उहाँ र हाम्रो पक्ष अलग बन्न गएको भएपनि उहाँ एकजना इमान्दार कम्युनिस्ट हुनुहुन्थ्यो । उहाँले जीवनभरि नै कम्युनिस्ट आन्दोलनमा आवद्ध भएर त्यसको सेवा गर्नु भएको थियो । उहाँको इमान्दार छवि तथा सामान्य र सादगी जीवनशैलीबाट वर्तमानमा नयाँ पुस्ताले पाठ सिक्नुपर्दछ । अन्तमा हामीले उहाँप्रति हार्दिक श्रद्धाञ्जली व्यक्त गर्दछौँ ।’
रहेनन् बामपन्थी नेता बर्मन बुढा
