बेलबहादुर रजाली, जयपुर ।
जयपुरबाट मूल प्रवाह अखिल भारत नेपाली एकता समाजका उत्तर नगर अध्यक्ष मङ्गलसिंह खड्कालाई विदाइ गरिएको छ ।
जागिरबाट सेवानिवृत्त भएपछि अप्रिल ५, २०२६ का दिन औपचारिक कार्यक्रममाझ उहाँलाई बिदाइ गरिएको हो ।
मूल प्रवाहको पश्चिमोत्तर क्षेत्रीय समितिका सदस्यसमेत रहनुभएका खड्कालाई स्थायी रूपमै स्वदेशमा बस्ने उहाँको निर्णयअनुसार नै बिदाई गरिएको मूल प्रवाहले जनाएको छ ।
बिदाई कार्यक्रममा मन्तव्य राख्दै केन्द्रीय सदस्य बेलबहादुर रजालीले खड्काजस्तो इमानदार, लगनशील र मिहिनेती कार्यकर्ताको स्वदेशभित्रको सङ्गठनमा अत्यन्त खाँचो रहेको बताउनुभयो ।
अबका दिनमा उहाँले स्वदेशभित्रको सङ्गठनलाई बलियो बनाउन आफ्नो योगदान दिने विश्वास रजालीले व्यक्त गर्नुभयो ।
साथै उहाँजस्तो कार्यकर्ताको अभाव जयपुरको सङ्गठनमा सधैँ खड्किरहने भएकोले चिन्तासमेत उहाँले व्यक्त गर्नुभयो ।
समारोहलाई केन्द्रीय सदस्य मोहन गिरी, केन्द्रीय प्रतिनिधि रिम राना र हुमा रजाली, पश्चिमोत्तर क्षेत्रीय समितिका उपाध्यक्ष ओम थापा, क्षेत्रीय सदस्य टङ्कबहादुर थापा, नारायण ज्ञवालीलगायतका कार्यकर्ताले पनि मन्तव्य राख्नुभएको थियो ।
कार्यक्रमको सञ्चालन बाबुराम थापाले, अध्यक्षता डम्बर केसीले तथा स्वागत दीपक थापाले व्यक्त गर्नुभएको थियो ।
सन् १९८२ मा जयपुरको हसनपुरा टोल समितिबाट साङ्गठनिक यात्रा प्रारम्भ गर्नुभएका खड्का विभिन्न खाले भड्कावका विरुद्ध सङ्घर्ष गर्दै अनवरत क्रियाशील हुनुहुन्थ्यो ।
प्युठान जिल्लाको नौबहिनी डाम्री जन्मघर रहेका खड्काको हाल दाङदेउखुरीमा स्थायी बसोबास रहेको छ ।
