काठमाडौँ । सचिवस्तरीय बैठकबाट सरकारी विज्ञापन निजी क्षेत्रलाई नदिने नीतिको विरुद्धमा नेपाल पत्रकार महासङ्घले सरोकारवाला पक्षमाझ छलफल सुरु गरेको छ ।
२०८२ चैत २० गते शुक्रबार महासङ्घको केन्द्रीय कार्यालय सञ्चारग्राममा सो छलफल सम्पन्न भएको हो ।
अध्यक्ष निर्मला शर्माको सहजीकरणमा सुरु भएको उक्त कार्यक्रममा महासङ्घकै केन्द्रीय कोषाध्यक्ष रामकृष्ण अधिकारीले विषयवस्तु प्रस्तुत गर्नुभएको थियो ।
कार्यक्रममा प्रगतिशील पत्रकार सङ्घका महासचिव प्रकाश थापामगर, प्रेस युनियनका उपाध्यक्ष जीवन भण्डारी, प्रेस सेन्टरका महासचिव मनोज घर्तीमगर, प्रेस चौतारीका महासचिव हीरामान लामालगायत विभिन्न सङ्गठनका प्रतिनिधिले आआफ्ना विचार राख्नुभएको थियो ।
त्यस्तै, वरिष्ठ पत्रकार पुरुषोत्तम दाहाल, मिडिसा सोसाइटीका अध्यक्ष मदन लम्साल, अर्का मिडिया संस्थाका मदन श्रेष्ठ, प्रेस काउन्सिलका नहकुल अर्याल, लोकतान्त्रिक छापासञ्जालका दामोदर दवाडी, अन्नपूर्ण पोस्टका प्रधान सम्पादक बालकृष्ण बस्नेतलगायत विभिन्न सञ्चारकर्मीले विषयकेन्द्रित मन्तव्य राख्नुभएको थियो ।
कार्यक्रममा सरकारी विज्ञापन निजी क्षेत्रका मिडियालाई नदिने सरकारी नीतिका विरुद्ध आन्दोलन, अदालत र वार्ता सबै मोर्चाबाट पहल सुरु गर्ने समझदारी बनेको महासङ्घकी अध्यक्ष शर्माले जानकारी दिनुभयो ।
‘काठमाडौँमा उपलब्ध महासङ्घ केन्द्रीय समितिका साथीहरूसित यस विषयमा छलफल गर्नेछौँ’ उहाँले भन्नुभयो– ‘मिडिया क्षेत्रका विभिन्न सङ्घसंस्थासँग पनि छलफल गरेर कार्यक्रम निश्चित गर्नेछौँ । त्यसमा तपाईंहरू सबैको प्रत्यक्ष सहभागिता र सहयोग मिल्ने अपेक्षा गरेकी छु ।’
कार्यक्रमको सञ्चालन महासङ्घकी केन्द्रीय सचिव सोनी शर्माले गर्नुभएको थियो ।
कार्यक्रममा महासङ्घका पदाधिकारी तथा केन्द्रीय सदस्य र विभिन्न सञ्चारमाध्यमका प्रतिनिधिको उपस्थिति रहेको थियो ।
