काठमाडौँ । कपिलवस्तु र दाङमा छुट्टाछुट्टै भएका हिंसात्मक घटनामा दुई जनाले ज्यान गुमाएका छन्। कपिलवस्तुको बाणगंगा नगरपालिका–१ क्वाटर चोक बस्ने ३२ वर्षीय सुमन चौधरीको हत्या गरेको अभियोगमा प्रहरीले सोही ठाउँका ४५ वर्षीय उदय अधिकारीलाई बिहीबार राति नियन्त्रणमा लिएको छ ।
अधिकारीले खुर्पा प्रहार गर्दा गम्भीर घाइते भएका चौधरीको लुम्बिनी प्रादेशिक अस्पताल बुटवलमा उपचारका क्रममा मृत्यु भएको बताइएको छ । इलाका प्रहरी कार्यालय पिपराबाट खटिएको टोलीले आरोपी अधिकारीलाई पक्राउ गरेको बताएको छ ।
यस्तै, दाङमा आफ्नै श्रीमतीको हत्या गरेको आरोपमा एक व्यक्ति पक्राउ परेका छन् । तुलसीपुर उपमहानगरपालिका–१९ दोघरे बस्ने ३३ वर्षीय गोपाल वलीले २७ वर्षीया श्रीमती कमला वलीलाई कुटपिट गरी हत्या गरेको स्थानीय प्रहरीले प्रशासनले जनाएको छ ।
घरायसी विवादका क्रममा गोपालले गरेको निर्घात कुटपिटबाट गम्भीर घाइते भएकी कमलाको राप्ती प्रादेशिक अस्पताल तुलसीपुरमा उपचारकै क्रममा निधन भएको हो । इलाका प्रहरी कार्यालय तुलसीपुरले गोपाललाई नियन्त्रणमा लिएको छ ।
यी दुबै घटनाका सम्बन्धमा प्रहरीले कानुनी प्रक्रिया अगाडि बढाउँदै थप आवश्यक अनुसन्धान गरिरहेको जनाएको छ ।
