काठमाडौँ । कुवेतमा इरानी हमलाले एयरपोर्ट ठप्प हुँदा नेपालीले सास्ती भोग्नु परिरहेको अवस्था छ । खासगरी भिसा समाप्त भएका नेपाली स्वदेश फर्किन नपाउँदा यस्तो सास्ती व्यहोर्नुपरेको हो ।
कुवेतस्थित नेपाली दूताबासले परराष्ट्र मन्त्रालयमार्फत असहज अवस्थामा परेका नेपालीलाई साउदी अरेबियाको एयरपोर्ट हुँदै नेपाल फर्किने व्यवस्था मिलाएको छ ।
हालसम्म १८ जनाजति नेपाली भिसा समस्याबाट पीडित भएको जानकारी दिँदै दूतावासले आफ्नो तर्फबाट आवश्यक सहजीकरण गरिरहेको जानकारीसमेत दिएको छ ।
कुवेत नेपाली एकता समाजका एक पदाधिकारीका अनुसार दूताबासले कुनै पनि अप्रिय स्थिति सिर्जना हुन नदिन सतर्कता अपनाएको छ ।
एकता समाजका ती प्रतिनिधिले भने– ‘हामी कुवेतस्थित दूताबासको नियमित सम्पर्कमा छौँ । सूचना आदानप्रदान गर्ने, आवश्यक सहजीकरण गर्ने सबै काम भइरहेको छ ।’
कुवेतमा हिजो बुधबार स्थानीय समयअनुसार बिहान ३ बजेदेखि इरानले मिसाल र ड्रोन हमला गरिरहेको छ । प्रतिनिधिका अनुसार अहिलेसम्म पनि हमला भएको सो स्थानबाट कालो धुवाँको मुस्लो उडिरहेको छ ।’
कुवेत सरकारले युद्धसम्बन्धी सूचना बाहिर ल्याउन प्रतिबन्ध लगाएको बताइएको छ । बुधबार बिहानको आक्रमणमा भौतिक क्षति भएको प्रत्यक्ष देख्न सकिए पनि मानवीय क्षति भएको/नभएकोबारे सरकार वा स्थानीय सञ्चारमाध्यमबाट कुनै जानकारी दिइएको छैन ।
आक्रमणको निसानामा अमेरिकी संरचना
एकता समाजका ती प्रतिनिधिका अनुसार इरानले अमेरिकी संरचनामा मिसाइल हमला केन्द्रित गरिरहेको छ ।
‘कुवेतमा करिब एक दर्जनभन्दा कम बेसक्याम्प रहेको भनिएको छ । अहिले त्यसलाई घटाएर आधा दर्जनमा सीमित गरिएको छ’ उनले भने– ‘त्यसबाहेक अमेरिकी लगानी भएका विभिन्न प्रोजेक्टमा पनि इरानले हमला गरिहेको छ ।’
केही दिनपहिले एउटा तेल प्रशोधन केन्द्र (रिफाइनरी) मा आक्रमण भएको थियो । सो रिफाइनरी यतिखेर मर्मत प्रक्रियामा रहेको छ ।
इरानले प्रहार गरेको मिसाइल वा ड्रोनलाई कुवेतले आकाशमै निष्क्रिय पारेको बताउँदै उनले अगाडि भने– ‘आकाशमा ती मिसाइल वा ड्रोनलाई निष्क्रिय नपारिएको भए कुवेतको अवस्था अहिलेजस्तो हुने थिएन ।’
नेपाली सुरक्षित
हालसम्म इरानी आक्रमणबाट खासै नेपाली नागरिकहरू प्रभावित नभएको ती प्रतिनिधिले बताए ।
‘अहिलेसम्म कुनै नेपाली अप्ठ्यारो वा अलपत्र परेको जानकारी हामीले पाएका छैनौँ’ उनले भने– ‘जे जति केही असहज भएका नेपालीको बारेमा जानकारी प्राप्त भएको छ, उनीहरूका लागि आवश्यक सहजीकरण गरिएको छ । मङ्गलबार नै दूताबासले १८ जना नेपालीको भिसा सहजीकरण गरेको छ ।’
कुवेतमाथि इरानी आक्रमणको निसानामा मुख्यत: एयरपोर्ट परेको छ । त्यसबाहेक अन्यत्र कतिप स्थानमा हमला भए पनि ठुलो क्षति भएको जानकारी दिइएको छैन ।
हमलाबाट एयरपोर्टका कार्यरत कामदार बढी प्रभावित भएका छन् ।
‘एयरपोर्टका कामदारको सुरक्षा कुवेती प्रशासनले गरिरहेको छ । उनीहरूको खाद्यान्न, आवास र सुरक्षा प्रशासनले नै गरिरहेको छ’ एकता समाजका ती प्रतिनिधिले युगदर्शनसित भने ।
कुवेती प्रशासनले हमलासित सम्बन्धित सामग्री सार्वजनिक गर्न रोक लगाएकोमा हालसम्म त्यस्तो कार्य गर्ने एक जना नेपालीलाई पक्राउ गरिएको छ ।
सरकारको यस्तो कडाइका कारण कुवेतमा आक्रमणबाट भएको क्षतिको वास्तविकताबारे कमै जानकारी मिल्ने गरेको ती प्रतिनिधिले दोहोर्याए ।
