मनोज भट्ट ##
काठमाडौको पाँचतारे होटलमा स्वतन्त्र पार्टीले आफ्ना निर्वाचित सांसदहरूका लागि आयोजना गरेको अभिमुखीकरण कार्यक्रम चर्चित तथा विवादित दुइटै बन्न पुगेको छ । रवि लामिछानेले उ्रक्त कार्यक्रममा गरेको भाषणलाई सबै सञ्चार माध्यमहरूले महत्त्वका साथ स्थान दिएर “चर्चित” बनाउने प्रयत्न गरेका थिए । तर रविकोे भाषण मेरो टिप्पणीको विषय होइन । वाकपटुतामा कुशल मान्छेले यत्तिको भाषण गर्नु कुनै नौलो र अनौठो कुरा होइन । अहिलेसम्म सत्तामा गएका कसैले पनि हामी भ्रष्टाचार गर्न, देश बर्बाद पार्न, राजनीतिको नाममा अनुचित तवरबाट सम्पत्ति जोड्न सरकारमा जाँदैछौँ भनेर भन्दैनन् तर व्यवहार ठिक त्यसको उल्टो गर्छन् । त्यसैले रविको भाषण कुरा गर्ने स्टाइल मात्र हो ।
अभिमुखीकरण कार्यक्रमको विवादित पाटोमा जाऔँ । रविले भाषणमा आफ्ना सांसदहरुलाई सदाचार, नैतिकता र देश सेवाको अर्ति उपदेश दिए । तर जुन होटेलमा कार्यक्रम चलिरहेको थियो, त्यसको मालिक राजेन्द्र शाक्यसँगको रवि कनेक्सन के हो ? रवि–राजेन्द्र बिचको सम्बन्धको रहस्यमय पाटो पनि अगाडि आएको छ । रवि–राजेन्द्र कनेक्शनले रविको सदाचार, नैतिकता, जनताको सेवाको कुरा खाली “कुरा गर्ने” स्टाइलमा परिणत हुन कुनै समय लागेन ।
राजेन्द्र शाक्य गुण एअरलाइन्सका सञ्चालक तथा गुण समूहका अध्यक्ष हुन् । हाल उनी प्रभु बैँकको कर्जा दुरुपयोगको अभियोगमा जेलमा छन् । प्रभु बैँकका प्रमुख सहित शाक्यको मिलोमतो अरबौँ रुपैयाँ दुरुपयोग गरेर बैँकलाई हानी नोक्सानी पुर्याइएको थियो । स्मरण रहोस् यिनै रविका विरुद्ध पाँचवटा जिल्ला अदालतमा चलिरहेका मुद्दामा प्रभु बैँकले नै करोडौँ रुपैया बराबरको नगद बैँक ग्यारेन्टी अदालतलाई दिँदै आएको थियो ।
स्वतन्त्र पार्टीको प्रभु बैँकको अरबौँ रुपैया दुरुपयोग संलग्नमा व्यक्तिको होटलमा कार्यक्रम कसरी आयोजना हुन पुग्यो ? के यो संयोग वा काकताली मात्र हो ? वा शुल्क तिरेर सेवा लिने सामान्य व्यापारिक कुरासँग मात्र सम्बन्धित छ ? वा योजनावद्ध ढंगबाट अब बन्ने सरकारको शीर्ष व्यक्तिको अनुग्रह प्राप्त गर्न राजेन्द्र शाक्यले कार्यक्रमका लागि होटेल उपलब्ध गराएका हुन् ? वा स्वयं रविले शाक्यबाट अनुचित लाभ लिन वा उठाउन वित्तिय अपराधमा मुछिएको मान्छेको होटेलमा जानीबुझी कार्यक्रम आयोजना गरेका हुन् ? यो रहस्यको विषय छ । यद्यपि यो विषय भविष्यमा खुल्दै जाला । तर यो प्रकरणमा रविलाई शंकाको सुविधा किमार्थ दिन मिल्दैन ।
काला व्यापारी, राजस्व छल्ने पुँजीपति वा बैँक लगायतका वित्तिय संस्थाहरूमा रजगज गर्न चाहने तत्त्वहरू राजनीतिक नेतृत्वबाट लाभ लिन उनीहरूको अनुग्रह प्राप्त गर्न विभिन्न प्रकारका नजराना वा उपहार दिएर आर्थिक प्रभावमा पार्ने गर्दछन् । स्वयं बुर्जुवा राजनीतिज्ञहरू पनि आफ्नो राजनीतिक रोटी सेक्न त्यस्ता तत्वहरूबाट मोटो रकम लिएर अनुचित लाभ लिने उद्देश्यले सम्बन्ध जोड्न खोजिरहन्छन् । रवि–राजेन्द्र बिचको सम्बन्ध त्यही अनुग्रह र अनुचित लाभको कडीसँग जोडिएको छ भन्दा अन्यथा हुँदैन ।
आर्थिक सवालमा बालेनको छवि तुलनात्मक रूपमा रविको भन्दा हालसम्म कम विवादित देखिन्छ । तर रविले सञ्चारकर्मीको आडमा समाचार प्रकाशन गरिदिने डर देखाएर विभिन्न व्यापारीहरूलाई ब्ल्याकमेलिङ गरेर मोटो रकम असुल्ने गरेको कुरा कसैबाट लुकेको छैन ।
सहकारीको करोडौँ रकम अपचलनमा झन् मुद्दा नै चलिरहेका छन् । रवि, जिबी तथा छवि कनेक्सन सबैका अगाडि जगजाहेर नै छ । त्यो अवस्थामा कुनै लाभ प्राप्त नभई रवि त्यो प्रकरणसँग जोडिएका होलान् भनेर विश्वास गर्न सकिन्न । यो कार्य अन्जानमा अज्ञानतावश भएको छ भनेर विश्वास गर्ने ठाउँ नै छैन । रवि तथा राजेन्द्र बिच गलत कनेक्सन देखिएका कारण उपस्थित हुने पूर्व निर्धारित कार्यक्रममा समेत बालेन अनुपस्थित रहेका थिए ।
भ्रष्टाचार सम्बन्धी नेपाल लगायत विश्वका कानुनहरुले कसैबाट अनुचित लाभ लिनुलाई भ्रष्टाचारको परिभाषाभित्र राखेका छन् । रविले शाक्यबाट कति अनुचित लाभ लिए ? प्रमाणको अभावमा एकीनका साथ भन्न नसकिएपनि उनीहरूका बिचको सम्बन्ध अनुग्रह र अनुचित लाभ प्राप्त गर्ने उद्देश्यद्वारा रहेको कुरालाई इन्कार गर्न सकिन्न । जे होस् रवि पक्षले जनताबाट दुई तिहाई सिटमा विजय प्राप्त गरेपछि आफ्नो राजकीय कार्यको शुभारम्भ अनुचित लाभ अर्थात् भ्रष्टाचारबाट गरेका छन् ।
