काठमाडौं । प्रधानमन्त्री केपी शर्मा ओली र स्वास्थ्यमन्त्री भानुभक्त ढकालविरुद्ध अख्तियार दुरुपयोग अनुसन्धान आयोगमा उजुरी परेको छ । कोरोन संक्रमण नियन्त्रणका लागि स्वास्थ्य सामग्री खरिद गर्दा अनियमितता भएको भन्दै इनफ इज इनफका अभियन्ताहरुले अख्तियारमा उजुरी दिएका हुन् ।
अभियन्ताहरुले स्वास्थ्य मन्त्रालयमा सूचनाको हक प्रयोग गरि कोभिड–१९ व्यवस्थापनमा सो मन्त्रालयले गरेको पूर्ण खर्चको विवरण माग गरेका थिए । सोही आधारमा उनीहरुले स्वास्थ्य सामग्री खरिदमा ब्यापक अनियमितता भएको भन्दै छानबिनको माग गरी उजुरी दिएको जनाएका छन् ।
स्वास्थ्य मन्त्री ढकाल, स्वास्थ्य सचिव लक्ष्मण अर्याल, स्वास्थ्य सेवा विभागका महानिर्देशक दिपेन्द्र रमण सिंह लगायत ओम्नीका सञ्चालक दुर्गा प्रसाद बेलबासे, भानुभक्त भट्टराई र प्रमुख कार्यकारी अधिकृत तुल हरि सिंह भुसाल विरुद्ध उजुरी दिइएको सो अभियानले जनाएको छ ।
यस्तै उनीहरुले स्वास्थ्य सामग्री खरिदमा सम्बन्ध देखिएको भन्दै प्रधानमन्त्री केपी शर्मा ओली, उपप्रधानमन्त्री ईश्वर पोखरेल, प्रधानमन्त्रीका राजनीतिक सल्लाहकार बिष्णु रिमाल र तत्कालिन स्वास्थ्य सचिव यादव कोइराला, स्वास्थ्य विभाग प्रमुक महेन्द्र श्रेष्ठ उपरसमेत छानबिनको माग गरेका छन् ।
इनफ इज इनफ अभियानका अभियन्ताहरुले स्वास्थ्य सामग्रीमा भएको भ्रष्टाचारको छानबिन गर्न र पीसीआर परीक्षण बढाउन माग गर्दै बालुवाटार अघि प्रदर्शन गरेका थिए भने केही अभियन्ताहरु करिब दुई हप्तासम्म अनसन बसेका थिए ।
