काठमाडौँ । साउदी अरबमा जनजीवन सहज देखिन्छ तर त्यहाँका नेपालीको आशङ्का छ, भोलि के हुन्छ ? थाहा छैन ।
साउदीको ताबुकमा कार्यरत खुमीराम भण्डारीले भन्नुभयो– ‘अहिलेसम्म रेडजोडमा भएजस्तो लाग्दैन । यहाँको जनजीवन सहज छ तर भोलि के हुन्छ, थाहा छैन ।
साउदी अरब नेपाली एकता समाजका अध्यक्षसमेत रहनुभएका भण्डारीका अनुसार साउदी सरकारले युद्धसम्बन्धी सूचना सार्वजनिक गर्न कडाइ गरेको छ । त्यसले गर्दा कहाँ के भइरहेको छ भन्ने यकिन थाहा हुँदैन ।
खाडीका नेपाली दूताबासले भने आइपर्ने कुनै पनि अप्ठ्यारो परिस्थितिको सामना गर्न तयार रहेको उहाँले जानकारी गराउनुभयो ।
‘मार्च १३, २०२६ का दिन नेपाली दूताबासले बैठक बोलाएको थियो’ उहाँले भन्नुभयो– ‘बैठकमा भविष्यमा आइपर्ने अप्ठ्यारासित जुध्ने विषयमा छलफल भएको थियो ।’
बैठकमा नेपाल जान चाहनेले वा अन्य समस्या परेकाले दूताबासमा सम्पर्क गर्ने र दूताबासले आवश्यक व्यवस्था मिलाउने सल्लाह भएको उहाँले युगदर्शनलाई जानकारी गराउनुभयो ।
खास समस्या
भण्डारीका अनुसार खास समस्या हवाई उडान नहुँदा देखा परेको बताउनुभयो ।
उहाँले भन्नुभयो– ‘हवाई उडान नहुँदा छुट्टीमा गएका नेपाली कामदार अलपत्र परेका छन् । यो एउटा गम्भीर समस्या भएको छ ।’
दूताबासले केही दिनमा परराष्ट्र मन्त्रालयसित सल्लाह गरेर यसबारे कदम चाल्ने जानकारी पाएको भण्डारीले बताउनुभयो ।
साउदीमा ड्रोन हमला दुईपटक भएको तर त्यसबाट जनधनको क्षतिसम्बन्धी जानकारी नभएको बताउनुभयो ।
