काठमाडौँ । कतारमा युद्धको गम्भीर असर देखिएको छैन । कतारमा रहनुभएका रामप्रसाद पराजुलीका अनुसार त्यहाँ इरानले मिसाइल आक्रमण गरे पनि स्थिति असहज छैन ।
कतार नेपाली एकता समाजका अध्यक्षसमेत रहनुभएका पराजुलीले इरानको मिसाइल वा ड्रोन आक्रमण भने यथावत् नै छ ।
‘इरानको मिसाइल वा ड्रोन आक्रमण जारी नै छ’ उहाँले भन्नुभयो– ‘तर त्यसको गम्भीर असर अझैसम्म देखिएको छैन । त्यस्तो जानकारी हामीले पाएका छैनौँ ।’
कतारको सनैया एरियामा अमेरिकाको बेसक्याम्प परेको छ । इरानी आक्रमण भएपछि बेसक्याम्पबाट अमेरिकीहरू दोहाका विभिन्न होटलमा लुकेको हुन सक्ने उहाँले बताउनुभयो ।
पराजुलीले भन्नुभयो– ‘बेसक्याम्पमा केही अमेरिकी सैनिक त छन् तर धेरै सैनिकहरू दोहाका विभिन्न क्याम्पमा लुकेर बसेका छन् जस्तो लाग्छ ।’
कतारको अमेरिका र इरान दुवै देशसँग सम्बन्ध त्यति खराब नभएकाले पनि यस्तो स्थिति देखिएको उहाँको बुझाइ थियो ।
‘कुनै बेला अन्य खाडी मुलुकले कतार विरुद्ध नाकाबन्दी गर्दा इरानले सघाएको थियो’ उहाँले भन्नुभयो– ‘त्यही भएर होला, अहिले आक्रमण भए पनि स्थिति भयावह बनिसकेको छैन ।’
त्यस्तै पराजुलीले युद्धका कारण त्यहाँका नेपालीहरू अलपत्र परेको अवस्था बाहिर नआएको बताउनुभयो ।
उहाँले भन्नुभयो– ‘राम्रा कम्पनीले नेपालीसहित सबै कामदारको व्यवस्थापन गरेका छन् । साना वा कमजोरीले भने त्यस्तो गर्न नसकेका हुन सक्छन् ।’
कतारका नेपालीहरू स्वाभाविक अवस्थामै रहेको उहाँको भनाइ थियो ।
‘जुन नेपालीहरू नेपाल फर्किने नियमित तालिकामा छन्, उनीहरू फर्किने तयारीमा छन्’ उहाँले भन्नुभयो– ‘तर युद्धकै कारण कम्पनी बन्द भएर वा अलपत्र भएर नेपाल फर्किनुपरेको अवस्था हामीले थाहा पाएका छैनौँ ।’
कतारको दूताबासले नेपाल फर्किन चाहने नेपालीलाई सहयोग गरिरहेको अवस्था रहेको उहाँको भनाइ थियो ।
कतार सरकारले भ्रामक सूचना नफैलाउन तथा यस्तो गर्नेलाई कारबाही गर्ने सूचना जारी गरेको पराजुलीले जानकारी गराउनुभयो ।
